एउटै विज्ञापनबाट इन्सपेक्टरमा भर्ना भएका तीन जना प्रहरी महानिरीक्षक

नेपाल प्रहरीले मंसिर ०५० मा प्रहरी निरीक्षक पदका लागि भर्ना खुलाएको थियो । माग संख्यासमेत नतोकी खुलाइएको विज्ञापनको नतिजा एक वर्षपछि मंसिर ०५१ मा प्रकाशित गरियो । नतिजा प्रकाशन गर्दा एक सयजनालाई उत्तीर्ण गराइयो । 

नतिजा प्रकाशन भएलगत्तै मध्यावधि निर्वाचनमार्फत एमालेले अल्पमतको सरकार बनायो । अघिल्लो सरकारले कांग्रेसनिकटलाई पास गराएको आशंकामा हालका प्रधानमन्त्री तथा तत्कालीन गृहमन्त्री रहेका केपी शर्मा ओलीले केही समय प्रहरी निरीक्षकको नियुक्ति रोके ।

नतिजा प्रकाशन भएको चार महिनापछि सयमध्ये ५२ जनालाई नियुक्ति दिइयो । जसमध्ये ५० जना नेपाल प्रहरी र दुईजनालाई विशेष प्रहरीमा पठाइयो । अन्य आठजनालाई वैकल्पिक सूचीमा राखियो । वैकल्पिक सूचीमा रहेकालाई १९ भदौ ०५२ मा नियुक्ति दिइयो । 

पास भएर पनि आफूहरूलाई नियुक्ति नदिइएको भन्दै बाँकी ४० जना हारगुहारमा लागे । तैपनि नियुक्ति नपाएपछि उनीहरू अदालत गए । अदालतबाट मुद्दाको फैसला नहुँदै एमाले सरकार ढल्यो । नयाँ सरकारले २७ कात्तिक ०५२ मा बाँकी ४० जनालाई पनि नियुक्ति दियो ।

त्यसरी नियुक्ति पाउनेमध्ये एक थिए चन्द्रकुवेर खापुङ, जसले नेपाल प्रहरीको ३२औँ आइजिपी हुने अवसर पाए । त्यसरी ढिलो नियुक्ति हुनु पनि उनका लागि अहिले प्रहरीको सर्वाेच्च पदमा पुग्ने अवसर बनेको छ । संयोग कस्तो भने त्यतीबेला ओलीले नै उनको नियुक्ति रोकेकोमा अहिले ओलीले नै उनलाई महानिरीक्षकमा नियुक्ति गरेका छन् । 

त्यसरी भर्ना हुने ४० मध्ये खापुङ मात्र आफ्नो ब्याचबाट आइजिपीको दाबेदार थिए। उनकै ब्याचका कृष्णहरि शर्मा पोखरेलले एआइजी पदबाट शनिबारबाट अवकाश पाइसकेका छन् । अन्य अधिकृतले उमेरहदका कारण यसअघि नै अवकाश पाएकाले प्रतिस्पर्धामा खापुङ एक्लो प्रतिस्र्धी बनेका हुन् । उनले १९ भदौदेखि २६ कात्तिकसम्म प्रहरीको नेतृत्व सम्हाल्नेछन् । 

त्यसो त २०५० सालको एउटै विज्ञापनबाट भर्ना भएका तीनजना प्रहरी महानिरीक्षक भएका छन् । हालका प्रहरी महानिरीक्षक थापा १९ भदौ ०५२ मा नियुक्ति पाउने आठमध्ये एक थिए । उनी गत ४ चैतमा आइजिपीमा नियुक्त भएका हुन् । उनीसँगै नियुक्त भएका सुदीप गिरी र टेकबहादुर तामाङले पनि आगामी १८ भदौमा अवकाश पाउँदै छन् । 

३०औँ आइजिपी वसन्तबहादुर कुँवर पनि सोही विज्ञापनका आधारमा पहिलो लटमा भर्ना भएका थिए । उनले करिब दुई वर्ष प्रहरीको नेतृत्व सम्हाल्ने अवसर पाए ।

खापुङको अवकाशपछि भने चैत ०५४ मा भर्ना भएका इन्स्पेक्टरको ब्याचबाट नयाँ नेतृत्व चयन हुनेछ । जसमा एआइजीहरू दानबहादुर कार्की, राजन अधिकारी र डा. मनोज केसी छन् । त्यस्तै, राष्ट्रिय अनुसन्धान विभागबाट स्थानान्तरण भएका सिद्धिविक्रम शाह पनि उनीहरूसँग प्रतिस्पर्धा छन् ।