आइजिपीमा खापुङ

• तत्कालीन गृहमन्त्रीको हैसियतमा ०५१ मा केही समय प्रहरी निरीक्षकको नियुक्त रोकेका प्रधानमन्त्री ओलीले सरकारको नेतृत्व गरेका वेला खापुङले छोटो समयका लागि आइजिपी बन्ने मौका पाए

सरकारले प्रहरी अतिरिक्त महानिरीक्षक (एआइजी) चन्द्रकुवेर खापुङलाई नेपाल प्रहरीको ३२औँ महानिरीक्षक (आइजिपी)मा नियुक्त गरेको छ । शुक्रबार मन्त्रिपरिषद् बैठकले उनलाई १९ भदौदेखि लागू हुने गरी आइजिपी नियुक्त गर्ने निर्णय गरेको हो । ब्याचका अन्य अधिकारी उमेरहदका कारण अवकाश भइसकेकाले आइजिपीको दौडमा उनी एक्ला प्रतिस्पर्धी थिए ।

हालका आइजिपी दीपक थापाले ३० वर्षे सेवावधि पूरा गरी १८ भदौमा अवकाश पाउँदै छन् । थापाको अवकाशसँगै खापुङले नेपाल प्रहरीको नेतृत्व सम्हाल्नेछन् । तर, उनले दुई महिना एक साता अर्थात् २६ कात्तिकसम्म प्रहरी नेतृत्व सम्हाल्नेछन् । हाल उनी सिआइबी प्रमुखका रूपमा कार्यरत छन् ।

प्रधानमन्त्री केपी ओली शनिबारदेखि चीन भ्रमणमा जाने भएकाले आइजिपी नियुक्तिसम्बन्धी निर्णय पाँच दिनअघि नै गरिएको हो । तेह्रथुम स्थायी घर भएका खापुङ २७ कात्तिक ०५२ मा प्रहरी निरीक्षक पदमा नियुक्त भएका थिए । प्रहरी संगठनमा उनी औसत क्षमताका अधिकारीका रूपमा चिनिन्छन् ।

एउटै विज्ञापनबाट भर्ना भएका तीन इन्स्पेक्टर बने आइजिपी 

नेपाल प्रहरीले मंसिर ०५० मा प्रहरी निरीक्षक पदका लागि भर्ना खुलायो । माग संख्यासमेत नतोकी खुलाइएको विज्ञापनको नतिजा एक वर्षपछि मंसिर ०५१ मा प्रकाशित गरियो । नतिजा प्रकाशन गर्दा सयजनालाई उत्तीर्ण गराइयो । 

नतिजा प्रकाशन भएलगत्तै मध्यावधि निर्वाचनमार्फत एमालेले अल्पमतको सरकार बनायो । अघिल्लो सरकारले कांग्रेसनिकटलाई पास गराएको आशंकामा हालका प्रधानमन्त्री तथा तत्कालीन गृहमन्त्री रहेका ओलीले केही समय प्रहरी निरीक्षकको नियुक्ति रोके ।

नतिजा प्रकाशन भएको चार महिनापछि सयमध्ये ५२ जनालाई नियुक्ति दिइयो । जसमध्ये ५० जना नेपाल प्रहरी र दुईजनालाई विशेष प्रहरीमा पठाइयो । अन्य आठजनालाई वैकल्पिक सूचीमा राखियो । वैकल्पिक सूचीमा रहेकालाई १९ भदौ ०५२ मा नियुक्ति दिइयो ।

पास भएर पनि आफूहरूलाई नियुक्ति नदिइएको भन्दै बाँकी ४० जना हारगुहारमा लागे । तैपनि नियुक्ति नपाएपछि उनीहरू अदालत गए । अदालतबाट मुद्दाको फैसला नहुँदै एमाले सरकार ढल्यो । नयाँ सरकारले २७ कात्तिक ०५२ मा बाँकी ४० जनालाई पनि नियुक्ति दियो ।

त्यसरी नियुक्ति पाउनेमध्ये एक थिए चन्द्रकुवेर खापुङ, जसले नेपाल प्रहरीको ३२औँ आइजिपी हुने अवसर पाए । त्यसरी ढिलो नियुक्ति हुनु पनि उनका लागि अहिले प्रहरीको सर्वाेच्च पदमा पुग्ने अवसर बनेको छ । त्यसरी भर्ना हुने ४० मध्ये उनी मात्र आफ्नो ब्याचबाट प्रतिस्पर्धामा थिए । उनकै ब्याचका कृष्णहरि शर्मा पोखरेलले एआइजी पदबाट शुक्रबार अवकाश पाइसकेका छन् । अन्य अधिकृतले उमेरहदका कारण यसअघि नै अवकाश पाएकाले प्रतिस्पर्धामा खापुङ एक्लो बनेका हुन् ।

त्यसो त एउटै विज्ञापनबाट भर्ना भएका तीनजना प्रहरी महानिरीक्षक भएका छन् । हालका प्रहरी महानिरीक्षक थापा १९ भदौ ०५२ मा नियुक्ति पाउने आठमध्ये एक थिए । उनी गत ४ चैतमा आइजिपीमा नियुक्त भएका हुन् । उनीसँगै नियुक्त भएका सुदीप गिरी र टेकबहादुर तामाङले पनि आगामी १८ भदौमा अवकाश पाउँदै छन् । 

३०औँ आइजिपी वसन्तबहादुर कुँवर पनि सोही विज्ञापनका आधारमा पहिलो लटमा भर्ना भएका थिए । उनले करिब दुई वर्ष प्रहरीको नेतृत्व सम्हाल्ने अवसर पाए ।

खापुङको अवकाशपछि भने चैत ०५४ मा भर्ना भएका इन्स्पेक्टरको ब्याचबाट नयाँ नेतृत्व चयन हुनेछ । जसमा एआइजीहरू दानबहादुर कार्की, राजन अधिकारी र डा. मनोज केसी छन् । त्यस्तै, राष्ट्रिय अनुसन्धान विभागबाट स्थानान्तरण भएका सिद्धिविक्रम शाह पनि उनीहरूसँग प्रतिस्पर्धा छन् ।