बाढीपहिरोले देशभरका विभिन्न नौ सडकखण्ड पूर्ण अवरुद्ध : सडक विभाग

अविरल वर्षाले देशभरका विभिन्न नौ सडकमा आवतजावत पूर्ण अवरुद्ध भएकाे छ । सडक विभागद्वारा जारी सूचनाअनुसार बाढीपहिरोका कारण आज विभिन्न नौ सडक अवरुद्ध भएका छन् भने १५१ सडकखण्डमा एकतर्फी यातायात सञ्चालनमा आएको सूचनामा उल्लेख छ।

सूचनाअनुसार मुलुकभरका ३७१ सडक खण्डमध्ये २११ सडक खण्ड पूर्ण खुलेका छन् । सडक विभागका सूचना अधिकृत अमितकुमार शर्माले बाढीपहिरो, डुबानले सडकमा क्षति पुग्नु, सवारीसाधन आवतजावतमा समस्या हुनु, पुल बगाउनु, पुल तथा सडक निर्माण, अन्य मर्मतकार्यलगायतका कारण सडक अवरुद्ध भएको जानकारी दिए।

उनका अनुसार कतिपय स्थानमा अझै पनि बाढी, पहिरोका कारण मर्मत गरेर सडक नियमित हुन सकेको छैन । कतिपय स्थानमा पहिरो पन्छाउने काम भइरहेको छ ।

विभागका अनुसार यही असार २४ गते हिमताल फुटेर चीनबाट आएको बाढीका कारण गल्छी, त्रिशूली-मैलुङ-स्याफ्रुबेँसी-रसुवागढी सडक खण्ड अझैसम्म पूर्ण रूपक अवरुद्ध भएको छ । यसैगरी, हुम्लाको पैमा नदीमा पानीको बहाव बढिरहेको कारण कर्णाली करिडोर दक्षिण खण्ड पनि पूर्ण रूपक अवरुद्ध छ ।

पानीको बहाव बढिरहेको र पुल निर्माण भइरहेको कारण उत्तर-दक्षिण कोशी राजमार्ग पनि पूर्ण रूपक अवरुद्ध भएको विभागको तथ्यांकमा उल्लेख छ । यही साउन ६ गते बेलिब्रिज बाढीले बगाएका कारण तमोर करिडोरको चतुरा-मुलघाट-माझीटार-अमरापुर डाँडा-गणेशचोक सडकखण्ड अवरुद्ध भएको विभागले जनाएको छ ।

तातोपानी-टिमुरेस्थित ठोरी-रसुवागढी सडक पनि पूर्ण रूपक अवरुद्ध भएको र हाल पहिरो पन्छाउने काम भइरहेको विभागको भनाइ छ । विभागका अनुसार पश्चिम रुकुमको भेरी करिडोरअन्तर्गत छिन्चु–मरिम सडकखण्ड पनि पूर्ण रूपमा अवरुद्ध भएको र लेदो पहिरो पन्छाउने काम भइरहेको छ ।

रोल्पाको सहिद राजमार्ग पनि पूर्ण रूपमा अवरुद्ध छ । निरन्तरको वर्षापछि पहिरो खसिरहेकाले वर्षा रोकिएपछि मात्रै पहिरो पन्छाउने काम हुने विभागले जनाउकाे छ । दैलेखको सुर्खेत-तल्लो डुगेश्वर-जुम्ला सडकखण्डसमेत लगातार सुक्खा पहिरो खसिरहेकाले राति बाटो बन्द हुने र दिउँसो नियमित हुने काम भइरहेको छ । यसैगरी अरनिको राजमार्गको सिन्धुपालचोकस्थित सडकखण्ड पूर्ण रूपमा अवरुद्ध भएको छ ।