चलचित्र ‘अभिमन्यु : च्याप्टर–१’ को पोस्टर सार्वजनिक

चलचित्र ‘अभिमन्यु : च्याप्टर–१’को नयाँ पोस्टर सार्वजनिक भएकाे छ । पाेस्टरमा खुसी र तनाव देखिएको छ । निर्माण पक्षले आज (बिहीबार) सार्वजनिक गरेको पोस्टरमा चलचित्रका शीर्ष ६ पात्र छन् । जसको शीर्ष स्थानमा कामेश्वर चौरसिया छन् ।

पोस्टरमा रहेका अन्य कलाकार शिशिर वाङ्देल, प्रकाश दाहाल, गौमाया गुरुङ, लक्ष्मी बर्देबा र सरिता गिरी छन् । प्रकाश, गौमाया र लक्ष्मी भने केही तनावमा देखिन्छन् ।

यो पोस्टरमा पनि सरकारी कार्यालय छुटेको छैन । जिल्ला कारागार मोरङ छ । अर्को एक सरकारी कार्यालय पनि देखिएको छ । तर, कुन हो प्रस्ट छैन ।

पोस्टर र कलाकारको अनुहारमा गरिएको रङ संयोजनले आँट, तनाव र गन्जागोलको संकेत गरेको छ । तर, केका लागि भन्ने प्रस्ट छैन । पैसा, सम्बन्ध, विश्वास जेसुकैको पनि हुन सक्ने अनुमान लगाउन सकिन्छ । यसअघि सोमबार ‘अभिमन्यु : च्याप्टर १’को दुईवटा पोस्टर सार्वजनिक भएको थियो ।

त्यसमा पनि खुसी र तनाव देखाइएको थियो । चलचित्र ‘अभिमन्यु : च्याप्टर–१’ भदौ २७ गते रिलिज हुँदै छ । हिन्दी भर्सन असोज ६ अर्थात् (सेप्टेम्बर २२) मा रिलिज हुने निर्माण पक्षले जनाएको छ । हिन्दी भर्सन पनि वर्ल्डवाइड रिलिज हुने निर्माता विनोद पौडेलले जानकारी दिएका छन् ।

चलचित्रले पैसाको प्रलोभनमा चक्रव्युहमा फस्ने र त्यहाँबाट उम्किन खोज्ने व्यक्तिको संघर्षको कथा भन्ने बताइएको छ । पोस्टप्रोडक्सनमा रहेको चलचित्र ‘अभिमन्यु : च्याप्टर–१’को मुख्य भूमिकामा कामेश्वर चौरासिया, सरिता गिरी, गौमाया गुरुङ, लक्ष्मी बर्देबा, शिशिर वाङ्देल, किरण श्रेष्ठ, प्रकाश दाहाल र सुष्मा निरौला छन् ।

सेभेन सिज सिनेमाको प्रस्तुति निर्माण भएको सिनेमा ‘अभिमन्यु : च्याप्टर–१’लाई सुशान्त गौतमले निर्देशन गरेका छन् । यो उनको डेब्यु निर्देशन हो । मुकेश खनालको लेखन रहेको चलचित्रको क्रिएटिभ निर्देशक मदन थापा हुन् ।

‘अभिमन्यु : च्याप्टर–१’ का निर्माता विनोद पौडेल र गुञ्जन गिरी हुन् । रमेश चौलागाईं र हरि श्रेष्ठ सहनिर्माता रहेको चलचित्रका कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन् ।

जीवन शाक्य लाइन प्रोड्युसर रहेको यस चलचित्रमा मनोज श्रेष्ठ भिएफएक्स, सुप्रिम पराजुली रंग संयाेजन, मदन घिमिरे सम्पादक रहेका छन् । ‘अभिमन्यु’मा शरद महतोको डिओपी रहेको छ ।