स्पेनमा मान्छे छाेडेको आरोपमा प्रधानमन्त्री ओलीले भने– घटिया राजनीतिको जवाफ दिन आवश्यक ठान्दिनँ

नेकपा एमालेका अध्यक्ष तथा प्रधानमन्त्री केपी ओलीले स्पेन भ्रमणका क्रममा उतै मान्छे छाेडेको आरोपलाई घटिया राजनीतिको संज्ञा दिएका छन् । उनले स्पेन भ्रमणका क्रममा राम्रो भूमिका खेलेका कारण यो आरोप लगाइएको दाबी गरे ।

गृहनगर झापाको दमकमा मदनगाँडी–ताराबारी–डिपु सडक स्तरोन्नतिको समुद्घाटन गर्दै ओलीले यस्ता घटिया राजनीतिको जवाफ दिन आवश्यक नरहेको बताए । उनले यस्तो घटिया राजनीति नगर्न सबैलाई सुझाव दिए । ‘म स्पेन गएको थिएँ । त्यहाँ हाम्रो भूमिकका असाध्यै राम्रो भयो । त्यो भूमिका सहन नसकेर केही प्रतिपक्षी र अराजकतावादी र झुटवादी पार्टीहरूले मान्छे छाडेर आयो भन्नेजस्ता वाहियात र घटिया कुरा गरे । योजनाबद्ध ढंगले प्रचार गरियो । त्यो प्रमाणित गर्न नसकिने कुरा हो,’ ओलीले भने, ‘यति घटिया राजनीति गर्नुहुँदैन । त्यस्ता कुराको जवाफ दिन म आवश्यक ठान्दिनँ म तिनीहरूलाई सप्रनु भन्न मात्र चाहन्छु । झुटमा आधारित घटिया राजनीति गर्नुहुँदैन । जहिल्यै पनि झुट बोकेछ बोलेको छ । यस्ता राजनीति कति टिक्छ ? त्यसकारण यस्तो राजनीति नगर्न म सबैलाई सुझाव दिन चाहन्छु ।’

प्रधानमन्त्री ओलीले देशका विकासको लहर चलेको बताए । उनले अस्पताल उद्घाटन, सुकुम्बासीलाई धनीपुर्जा वितरणका काम देशभर भइरहेको बताए । देशभर सडक तथा पुल बन्ने क्रम पनि तीव्र रूपमा अघि बढेको बताए । उनले हरेक क्षेत्रमा प्रगति भइरहेको दाबी गरे । ‘गत वर्ष ४८ प्रतिशत रहेको एसइईको नतिजा यसपटक ६२ प्रतिशत पुगेको छ । हामीले विशेष प्रबन्ध गरेर पुर्‍याएका हौँ । विद्यार्थीलाई निःशुल्क अनलाइन ट्युसन कक्षा दिएका छौँ । यो मेरो पहलमा भएको हो,’ ओलीले भने, ‘आउँदो वर्ष ७० प्रतिशत बनाउँछौँ । तीन लाख विद्यार्थीलाई अनलाइन ट्युसन पढाउँछौँ ।’

प्रधानमन्त्री ओलीले दमकको विकासले फड्को मारेको बताए । उनले दमकमा बनेको बिजनेस टावर (भ्युटावर)ले झापाको समृद्धि ल्याउने बताए । उनले यहाँ ल्यान्डपुलिङकाे काम गरेर नयाँ सहर स्थापना गर्ने बताए । प्रधानमन्त्री ओलीले दमकमा औद्योगिक क्षेत्र निर्माण हुने बताए । जसले यहाँका नागरिकलाई रोजगारी दिने उनको भनाइ छ । दमकमा अर्बौँको लगानीमा विशाल रंगशाला बनाउने दाबी गरे ।

जब ओलीले बोल्दा बिजुली गयो

प्रधानमन्त्री ओलीले करिब १५ मिनेट भाषण गर्दै गर्दा बिजुली गयो । उनले दमकको विकास भएको बताउँदै गर्दा बिजुली गएपछि पनि केहीबेर माइकविना नै भाषण गरे । करिब दुई मिनेट बोलेपछि उनले आफ्नो भाषण टुंग्याए । उनले भाषण टुंग्याउना साथ बिजुली पुनः आयो ।