- वि.सं Invalid date format
वाणिज्य, आपूर्ति तथा उपभोक्ता संरक्षण विभागले त्रिभुवन अन्तर्राष्ट्रिय विमानस्थल क्षेत्रमा सञ्चालनमा रहेका होटेल, रेस्टुरेन्टमा अनुगमन गरेको छ ।
विभागले सोल्टी होटेल लिमिटेड, ओरियन्टल होटेल्स लिमिटेड, सान इन्टरप्राइजेज सर्भिसेज प्रालि, साई किरण इन्टरप्राइजेज, इन्जी ट्रेड र एयरपोर्ट टी–कफी एन्ड कन्फेक्सनरी सपमा अनुगमन गरी कैफियतका आधारमा जरिवानासमेत तिराएको जनाएको छ ।
स्थलगत निरीक्षणमा यी व्यवसायबाट आवश्यक कागजात र कानुनी प्रक्रिया नपुगेको पाइएको थियो । सोही आधारमा सम्बन्धित फर्महरूलाई तीन दिनभित्र विभागमा आवश्यक कागजातसहित उपस्थित हुन निर्देशन दिइएको छ ।
अनुगमन गरिएमध्ये मूल्यसूची नराखेको र बढी मूल्य असुलेको भेटिएपछि इजी ट्रेडलाई दुई लाख ६० हजार र एयरपोर्ट टी–कफी एन्ड कन्फेक्सनरी सपलाई दुई लाख पाँच हजार जरिवाना गरिएको छ । दुवै फर्मलाई तीन दिनभित्र विभागमा उपस्थित हुनसमेत निर्देशन दिइएको छ । विभागले व्यवसायसँग सम्बन्धित सम्पूर्ण कागजात बुझाउन र ऐनबमोजिम सञ्चालनमा सुधार गर्न निर्देशन दिएको जनाएको छ ।
त्यस्तै, काठमाडौं– २५ स्थित प्रतिबुद्ध इन्टरप्राइजेज प्रालिलाई सामान्य निर्देशन मात्रै दिइएको छ भने ललितपुर– ८ स्थित मनमय इन्टरप्राइजेजलाई दुई लाख ८० हजार जरिवाना गरिएको विभागले जनाएको छ ।
