मगरात क्षेत्रको मुख्य पर्व भूमे आजदेखि सुरु

मगरात क्षेत्रको मुख्य पर्व भूमे आजदेखि साताव्यापी रूपमा सुरु भएको छ । यस अवसरमा रोल्पा, रुकुम क्षेत्रमा ‘नाम्क’ अर्थात् भूमे पर्व धुमधामका साथ मनाइन्छ । प्रकृतिको पूजा गरी बाढीपहिरो रोकथाम होस् भन्ने आस्था र जनविश्वासका साथ यो पर्व  मनाइन्छ । हरेक वर्ष असार १ देखि रोल्पाको थबाङमा साताव्यापी रूपमा भव्य भूमे नाच नाच्ने गरिन्छ ।

दाङ, रोल्पा, रुकुमपूर्व र प्युठानका सम्बन्धित समुदायलाई सार्वजनिक बिदा

भूमे पर्वका अवसरमा लुम्बिनी प्रदेश सरकारले चार जिल्लामा सार्वजनिक बिदा दिएको छ । लुम्बिनी प्रदेश आन्तरिक मामिला तथा कानुन मन्त्रालयका प्रवक्ता कृष्णप्रसाद नेपालका अनुसार दाङ, रोल्पा, रुकुमपूर्व र प्युठानका सम्बन्धित समुदायलाई बिदा दिएको हो ।

भूमे पर्व मगर समुदायले विशेष पर्वका रूपमा मनाउने गर्छन् । विगत वर्षमा पनि प्रदेश सरकारले भूमे पर्वका अवसरमा बिदा दिँदै आएको थियो ।