- वि.सं Invalid date format
चालू आर्थिक वर्षको दश महिनामा रु. १३ खर्ब ५६ अर्ब ६१ करोड विप्रेषण आप्रवाह भएको छ।
नेपाल राष्ट्र बैंकले चालू आर्थिक वर्षको दश महिनाको तथ्यांकमा आधारित भएर आज सार्वजनिक गरेको देशको वर्तमान आर्थिक प्रतिवेदनअनुसार गत वैशाख मसान्तसम्म उक्त रकम स्वदेश भित्रिएको हो। वैशाख महिनामा मात्र रु. एक खर्ब ६५ अर्ब ३० करोड भित्रिएको थियो।
गत वैशाख मसान्तसम्ममा वैदेशिक रोजगारीका लागि चार लाख पाँच हजार ६१० जनाले अन्तिम स्वीकृति र दुई लाख ८० हजार ३१४ ले पुनः श्रम स्वीकृति लिएका छन्। प्रतिवेदनअनुसार वैशाख मसान्तसम्ममा मुलुकको चालू खाता रु. दुई खर्ब ५५ अर्ब ९३ करोडले बचतमा रहेको छ। अघिल्लो वर्षको सोही अवधिमा चालू खाता रु. एक खर्ब ९३ अर्ब ३१ करोडले बचतमा थियो।
वैशाख मसान्तसम्ममा खुद पुँजीगत ट्रान्सफर रु. आठ अर्ब ४८ करोड छ भने रु. १० अर्ब ६० करोडबराबर प्रत्यक्ष वैदेशिक लगानी भित्रिएको छ। समीक्षा अवधिमा शोधनान्तर बचत रु. चार खर्ब ३८ अर्ब ५२ करोड रहेको छ। विदेशी विनिमय सञ्चिति रु. २५ खर्ब १२ अर्ब ९५ करोड पुगेको छ।
समीक्षा अवधिको आयातलाई आधार मान्दा बैंकिङ क्षेत्रमा रहेको विदेशी विनिमय सञ्चितिले १७.४ महिनाको वस्तु आयात र १४.६ महिनाको वस्तु तथा सेवा आयात धान्न पर्याप्त हुने केन्द्रीय बैंकले जनाएको छ।
