- वि.सं २o८२ जेठ १४ बुधबार
बुटवलमा एक महिलासहित दुई बच्चाको बीभत्स हत्या भएको छ । हत्या भएकाहरूमा बुटवल उपमहानगरपालिका– ११, होराइजनचोकनजिक मिलिजुली पथमा अन्दाजी २७ वर्षीया दीपा बस्याल, उनका दुई छोरीहरू सात वर्षीया स्नेहा बस्याल र चार वर्षीया नानी बस्याल रहेको प्रहरीले जानकारी दिएकाे छ । हत्यामा संलग्न भएको आरोपमा अन्दाजी ३०/३२ वर्षका सुजन कोइरालालाई प्रहरीले नियन्त्रणमा लिएको छ ।
‘धारिलो हतियार र हथाैडा प्रयोग गरेर हत्या गरिएको छ। थप अनुसन्धान हुँदै छ,’ जिल्ला प्रहरी कार्यालय रुपन्देहीका डिएसपी सुरज कार्कीले भने । हत्यामा संलग्न आशंका गरिएका काेइराला दीपाका पूर्वपति हुन् । उनी आफ्नै दाजु मारेर जेल बसी केही वर्षअघि संविधान दिवसको दिन आममाफी पाएर छुटेको व्यक्ति रहेको स्थानीयले बताएका छन्। दीपा काेइरालासँग डिभोर्स भएर अर्कैसँग विवाह गरी बसेकी थिइन् । पूर्वश्रीमानले दीपालाई आफ्नै घरमा बोलाई आज बिहान अन्दाजी चार बजेतिर हत्या गरेका थिए।
उनीहरूबिच करिब ८–१० वर्ष पहिले नै सम्बन्धविच्छेद भएको प्रहरीले बताएको छ। यद्यपि, घटनाको सम्पूर्ण विवरण आउन बाँकी रहेको प्रहरीको भनाइ छ। घटनास्थलमा पुगेर प्रहरीले थप अनुसन्धान अघि बढाएको छ ।
