जेलेन्स्की रुससँग ‘सम्झौता’ गर्न तयार रहेको ट्रम्पको दाबी

अमेरिकी राष्ट्रपति निर्वाचित डोनाल्ड ट्रम्पले युक्रेनका राष्ट्रपति भोलोदिमिर जेलेन्स्की रुससँगको युद्ध अन्त्यका लागि ‘सम्झौता’ गर्न इच्छुक रहेको बताएका छन्। फ्रान्सेली राष्ट्रपति इमानुएल म्याक्रोले जेलेन्स्की र ट्रम्पसँग शनिबार एलिसी प्यालेसमा आयोजना गरेका त्रिपक्षीय वार्तापछि ट्रम्पको उक्त भनाइ आएको हो। 

ट्रम्पले युक्रेनलाई पठाइएको अर्बौं डलरको सैन्य सहायताको खुलेर खिल्ली उडाउँदै आफ्नो निर्वाचन अभियानका क्रममा आफू राष्ट्रपति निर्वाचित भएमा जिम्मेवारी सम्हालेको २४ घण्टाभित्र नै द्वन्द्व अन्त्य गर्न सक्ने दाबी गरेका थिए।

ट्रम्पले आफ्नै लगानीमा सञ्चालित सामाजिक सञ्जाल ट्रुथ सोसल प्लेटफर्ममा लेखेका छन्, ‘जेलेन्स्की र युक्रेन सम्झौता गर्न र युद्ध रोक्न चाहन्छन्। तत्काल युद्धविराम हुनुपर्छ र वार्ता सुरु हुनुपर्छ। धेरैको जीवन यति अनावश्यक रूपमा बर्बाद भइरहेको छ। धेरै परिवारहरू गुमेका छन्।  यदि यो जारी रह्यो भने यो धेरै ठुलो क्षति र अझ खराब अवस्थामा परिणत हुन सक्छ।’

त्रिपक्षीय भेटको केही घण्टामा नै अमेरिकी राष्ट्रपति जो बाइडेन प्रशासनले युक्रेनका लागि ९८ करोड ८० लाख अमेरिकी डलरको नयाँ सैन्य सहायता प्याकेज घोषणा गरेको छ। पेन्टागनका अनुसार उक्त प्याकेजमा ड्रोन, हिमार्स रकेट लन्चरका लागि गोलाबारुद, लामो दूरी मार हान्न सक्ने हतियार, ट्यांक र बख्तरबन्द गाडीका लागि उपकरण र त्यसका सामान समावेश गरिएको छ।

ट्रम्पले युक्रेनमा आन्तरिक रूपमा अलोकप्रिय सहुलियतसहित शान्तिको लागि दबाब दिन सक्ने चिन्ता छ। जेलेन्स्कीले रुससँग कुनै पनि सम्झौता समतामूलक हुनुपर्नेमा जोड दिएकाे बताइएको छ। 

‘हामी सबै शान्ति चाहन्छौँ। तर, यो हाम्रो लागि धेरै महत्त्वपूर्ण छ। शान्ति हामी सबैका हुनुपर्छ। रुस र रुसी राष्ट्रपति भ्लादिमिर पुटिन वा अन्य कुनै आक्रमणकारी अब कहिल्यै युक्रेनमा नफर्कने सम्भावनालाई सुनिश्चित गर्नुपर्छ,’ जेलेन्स्कीले भने, ‘सबैभन्दा महत्त्वपूर्ण कुरा न्यायपूर्ण शान्ति र सुरक्षाको प्रत्याभूतिको हो। युद्धविराम वा शान्ति सम्झौताले युक्रेनका लागि बलियो सुरक्षा सुनिश्चित गर्नु आवश्यक छ।’ 

जेलेन्स्कीले वार्तालाई ‘राम्रो र फलदायी’ भन्दै ट्रम्पको दृढ संकल्पका लागि धन्यवाद पनि दिएकाे बताइएको छ। नोट्रे डेम क्याथेड्रलको पुनः उद्घाटन समारोहमा भाग लिनुभन्दा ठिकअघि ट्रम्पसँग जेलेन्स्कीको भेट, अमेरिकी चुनावमा विजय हासिल गरेपछि विश्वका धनाढ्यबाट राजनीतिज्ञ बनेका ट्रम्पसँगको पहिलो प्रत्यक्ष भेट थियो।

छलफलप्रति आफ्नो प्रतिक्रियामा म्याक्रोँले सामाजिक सञ्जालमा लेखेका छन्, ‘शान्ति र सुरक्षाका लागि संयुक्त प्रयास जारी राखौँ।’

मध्यपूर्वको संकटमा युरोपेली मित्रराष्ट्रहरूले बाइडेनसँग घनिष्ठ सम्बन्ध कायम गरेका छन्। तर, ट्रम्पले सहयोगी पश्चिमा राष्ट्र र संयुक्त राज्य अमेरिकालाई अझ टाढा र इजरायललाई नजिकबाट राख्ने सम्भावना छ।