प्रेरक प्रसंग : याचकको जीवन बदल्ने घटना

एक याचक सिसाकलमले भरिएको एउटा कचौरा लिएर रेल्वे स्टेसनमा बसेका थिए । एक युवा व्यवसायीले कचौरामा ५० रुपैयाँ हालिदिए । तर, सिसाकलम लिएनन् । उनी रेल चढे । रेल हिँडिसकेको थिएन । युवा व्यवसायी अचानक रेलबाट उत्रिएर ती याचककहाँ पुगे, केही सिसाकलम उठाउँदै भने– म केही सिसाकलम लिन्छु । मैले तपाईंलाई दिएको रकम यसको मूल्य भयो । आखिर तपाईं पनि त एक व्यापारी हो र म पनि । 

केही वर्षपछि ती व्यवसायी एक भोजमा सहभागी भए । भोजमा ती याचक पनि उपस्थित थिए । व्यवसायीले उनलाई चिनेनन् । तर, याचकले उनलाई तत्काल चिने । याचक व्यवसायीको नजिक पुगे र उनलाई नमस्कार गर्दै भने– सायद तपाईंले मलाई चिन्नुभएन होला । तर, म तपाईंलाई राम्ररी चिन्छु । याचकले आफ्नो जीवनमा घटेको सोही पुरानो घटना व्यवसायीलाई सुनाए । व्यवसायीले भने– हो, तपाईंले सम्झाएपछि मैले सो घटना राम्रैसँग सम्झिएँ । त्यतिखेर तपाईं भिख माग्दै हुनुहुन्थ्यो । तर, अहिले त टाई, सुटमा ठाँटिनुभएको छ नि ? 

याचकले जवाफ दिए– सायद तपाईंलाई थाहा नहोला, त्यस दिन तपाईंले मेरा लागि के गर्नुभयो भनेर । मलाई दया गर्नुको साटो तपाईं मसँग सम्मानसाथ प्रस्तुत हुनुभयो । तपाईंले कचौराबाट केही सिसाकलम उठाएर भन्नुभयो– मैले दिएको रकम तपाईंको सिसाकलमको मूल्य हो । आखिरमा तपाईं पनि एक व्यापारी हुनुहुन्छ र म पनि । 

तपाईं रेल चढेर गइसकेपछि मैले धेरैबेरसम्म सोचेँ । म यहाँ के गर्दै छु ? म किन भिख माग्दै छु ? जस्ता प्रश्नले मलाई घोचे । त्यसपछि आफ्नो जिन्दगी सुधार्ने संकल्पसाथ मैले घरघरमा पुगेर सिसाकलम बेच्न थालेँ । बिस्तारै मेरो व्यापार बढ्दै गयो । म कापी, पुस्तक आदि बिक्री गर्न थालेँ । आज पूरै सहरमा म यी सामग्रीको सबैभन्दा ठूलो थोक विक्रेता बनेको छु । मेरो सम्मान फर्काउन र व्यवसायमा लाग्न बाटो देखाइदिएकोमा म तपाईंलाई हृदयदेखि नै धन्यवाद दिन्छु । किनकि, सो घटनाले मेरो जीवन बदलिदियो ।