बाँकेको जानकी गाउँपालिका- ६ स्थित गनापुरमा लागुऔषध कारोबारी पक्राउ गर्न आज प्रहरीले गोली प्रहार गरेको छ।
लागुऔषध नियन्त्रण ब्युरो, काठमाडौंबाट खटिएको प्रहरी टोली र जिल्ला प्रहरी कार्यालय, बाँकेबाट खटिएको संयुक्त टोलीले पक्राउ गर्न खोज्दा भागेपछि गोली प्रहार गरिएको जिल्ला प्रहरी कार्यालय, बाँकेका प्रहरी नायब उपरीक्षक नारायण डाँगीले जानकारी दिए।
उनले कोहलपुर नगरपालिका- १२ चप्परगौडीनिवासी २६ वर्षीय सुशील परियारलाई गोली प्रहार गरी पक्राउ गरिएको बताए। परियारको बायाँ खुट्टामा गोली लागेको र उनको अहिले भेरी अस्पताल, नेपालगन्जमा उपचार भइरहेको प्रहरीले जनाएको छ।
साथै प्रहरीले स्थानीय २७ वर्षीय शरणबहादुर कार्कीलाई पक्राउ गरेको छ। उनीहरूको साथमा रहेको ११४.२५ ग्राम ब्राउनसुगर प्रहरीले बरामद गरेको छ। कार्कीलाई जिल्ला प्रहरी कार्यालय, बाँकेको हिरासतमा लिइएको छ।
पक्राउ परेकाहरूलाई लागुऔषध कारोबारसम्बन्धी मुद्दा चलाइने प्रहरी नायब उपरीक्षक डाँगीले जानकारी दिए। प्रहरीका अनुसार उनीहरूलाई लागुऔषधको कारोबार गरिरहेको भन्ने सूचना पाएपछि लामो समयदेखि प्रहरीले निगरानीमा राखेको थियो। रासस