- वि.सं २o८१ जेठ ७ सोमबार
काठमाडौं महानगरपालिकाभित्र रातको समयमा सजावटका लागि राखिएका बत्ती (झिलिमिली)को वातावरणीय, जनस्वास्थ्य, सहरी व्यवस्थापनलगायत कोणबाट अध्ययन हुने भएको छ । उपमेयर सुनिता डंगोलको अध्यक्षतामा मंगलबार बसेको अनुगमन समितिले ती बत्तीले पारेको असरबारे अध्ययन गर्ने निर्णय गरेको हो ।
ती बत्तीले पैदल वा सवारी यात्राका क्रममा पार्ने प्रभाव, रातको समयमा वास बस्ने तथा उड्ने चराचुरुंगी र अन्य जीवजन्तुलाई पार्ने असर, रूख वा बिजुलीका पोल र बत्तीका तारले पार्ने असरलगायत विषयमा अध्ययन गर्ने निर्णय भएको हो । सामाजिक तथा व्यावसायिक जीवन, पर्यावरण र जैविक विविधता, स्वास्थ्य र सहजताजस्ता पक्षबाट अध्ययन गर्ने बैठकले निर्णय गरेको छ ।
‘एउटा अभ्यास पछ्याउँदै सहरका विभिन्न ठाउँमा झिलिमिली बत्ती राखिएका छन् । सडक किनारामा, सम्पदा क्षेत्रमा, पार्कमा, सार्वजनिकस्थलमा धेरैतिर यस्ता बत्ती छन् । यसरी राखिएका बत्ती बारे मिश्रित बुझाइ छ । यस्ता बत्ती कहाँ राख्नुपर्ने हो, कति समयका लागि बाल्नुपर्ने हो, बत्ती राख्दा सकारात्मक र नकारात्मक प्रभाव के हुन्छ ? थाहा पाउन आवश्यक छ । यसका लागि छिट्टै प्रतिवेदन आउने गरी अध्ययन गराउनुपर्छ,’ उपमेयर डंगोलले भनिन् ।
सडक किनारामा राखिएका यस्ता बत्तीको उज्यालोले गाडी चलाउन कठिन भएको भन्दै प्रमुख प्रशासकीय अधिकृत प्रदीप परियारले कुन ठाउँमा कस्तो खालको बत्ती आवश्यक पर्ने हो, यसको मापदण्ड आवश्यक भएको बताए । ‘वातावरण र इलेक्ट्रिक इन्जिनियरसहितको टोलीले यसको अध्ययन गर्ने र अध्ययनको सिफारिसका आधारमा बत्ती व्यवस्थापनको निर्णय लिइनेछ,’ उनले भने । बैठकमा कानुन तथा मानव अधिकार विभाग, राजस्व विभाग, वातावरण व्यवस्थापन विभाग, सार्वजनिक निर्माण विभाग, योजना अनुगमन तथा मूल्यांकन एकाइका प्रमुख तथा प्रतिनिधिहरू सहभागी थिए ।
