खेलकुद प्रिन्ट संस्करण

एमेच्योर सदभावलाई उपाधि

एमेच्योर सदभाव आचार्यले प्रोफेसनल गल्फर भुवन नगरकोटीलाई सात स्ट्रोकले पछि पार्दै उपाधि हात पारे

प्रोफेसनल गल्फर भुवन नगरकोटीलाई सात स्ट्रोकको फराकिलो अन्तरमा हराउँदै एमेच्योर सदभाव आचार्यले सूर्य नेपाल गल्फ टुर २०२३–२४ अन्तर्गत छैटौँ सूर्य नेपाल एनपिजिए टुर च्याम्पियनसिपको उपाधि जितेका छन् । प्रतियोगिताको बिहीबार अन्तिम दिन तीन अन्डर ६९ को स्कोरसहित समग्रमा १४ अन्डर दुई सय ७४ स्कोरमा सदभावले उपाधि हात पारेका हुन् ।

उनले यस सिजनमा टुरको प्रोफेसनल र एमेच्योरतर्फका उपाधि आफ्नो नाममा लेखाएका छन् । यस सिजन उनको यो दोस्रो उपाधि हो । यसअघि उनले सूर्य नेपाल सेन्ट्रल ओपन र गत सिजन सूर्य नेपाल च्यालेन्जको उपाधि जितेका थिए ।अन्तिम १८ होलको सुरुमा भुवन र सदभावबीच कडा प्रतिस्पर्धा हुने अनुमान थियो ।

भुवनले तीन ओभर ७५ स्कोरको खराब प्रदर्शन गरे । उनी समग्रमा सात अन्डर दुई सय ८१ स्कोरसहित दोस्रो भए । प्रोफेसनलतर्फ उनी पहिलो हुँदै एक लाख ४० हजार रुपैयाँ हात पारे । एमेच्योर खेलाडीको दबदबा राख्ने क्रममा विजय श्रेष्ठ आइन्हाउस र प्रोफेसनल नीरज तामाङले संयुक्त रूपमा तेस्रो स्थान बाँडे । दुवैले समग्रमा चार अन्डर दुई सय ८४ स्कोर गरे । विजयले अन्तिम दिन एक अन्डर ७१ र नीरजले दुई अन्डर ७० को प्रदर्शन गरे । प्रोफेसनलतर्फ दोस्रो भएका नीरजले ९६ हजार प्राप्त गरेका छन् ।

समग्रमा इभन पार दुई सय ८८ मा खेल सकेका दिनेश प्रजापतिले प्रोफेसनलमा तेस्रो स्थान रक्षा गर्दै ७२ हजार रुपैयाँ जिते । उनले अन्तिम दिन तीन ओभर ७५ स्कोर गरे । सञ्जय लामा र धनबहादुर थापाले प्रोफेसनलमा  संयुक्त रूपमा चौथो स्थान बाँडेका छन् । सञ्जयले दुई ओभर ७४ र धनले एक अन्डर ७१ को स्कोर निकाले । दुवैले ५४ हजार पाँच सय रुपैयाँ जिते । रवि खड्काले दुई ओभर ७४ को स्कोरसहित छैटौँ स्थानमा प्रतियोगिता सके । उनले ४२ हजार पाँच सय रुपैयाँ जिते । 

 सातौँ होल टर्निङ प्वाइन्ट
भुवन र सद्भावले दिनको खेल सुरु गर्दा एक–आपसमा एक स्ट्रोकको फरक राखेका थिए । तेस्रो होलमा भुवनले बर्डी प्रहार गर्दै खेल बराबरीमा ल्याएका थिए । तर, छैटौँ होलमा उनले बोगी प्रहार गर्दा सद्भावले एक सट बचाए । छैटौँ होलको समाप्तिमा सद्भावले दुई स्ट्रोकको अग्रता बनाए । उपाधि छिनोफानोको टर्निङ प्वाइन्ट सातौँ होल बन्यो । भुवनको दोस्रो सट पोखरीमा खस्यो । त्यहाँबाट हानेको प्रहार पुनः पानीमै पुग्यो । उनले यो होलमा डबल बोगी खेप्दा सद्भावले चार स्ट्रोकको अग्रता लिए । यसपछि आठौँ र नवौँ होलमा फेरि समान एक सट गुमाउँदा भुवनले फ्रन्ट नाइन चार ओभर ४० स्कोर गरे ।

सद्भावले एक अन्डर ३५ मा फ्रन्ट नाइन पूरा गरे । फ्रन्ट नाइन सकिँदा सद्भावले भुवनलाई ६ स्ट्रोकले पछि पारेका थिए । बोगीरहित खेलेका सदभावले १२औँ र १७औँ होलमा बर्डी प्रहार गरे । उनले ब्याक नाइन दुई अन्डर ३४ को स्कोर गरे । यसरी सहजै सद्भाव च्याम्पियन बन्दै फेरि एकपटक प्रोफेसनल गल्फरलाई माथ दिन सफल रहे ।

लगातार तीन दिन शीर्ष स्थानमा रहेर भुवनले अन्तिम दिन संघर्ष गरे । उनले ब्याक नाइन एक अन्डर ३५ स्कोर गरेका थिए । अन्तिम दिनमा उनको प्रदर्शन कमजोर रह्यो । उनले ब्याक नाइनमा १३औँ, १४औँ र १८औँ होलमा बर्डी प्रहार गरे । उनले १५औँ र १६औँ होलमा एक–एक सट बचाए । यसरी भुवनले समग्रमा दोस्रो र प्रोफेसनल पहिलो स्थान प्राप्त गरे । एमेच्योर विजयले टुरमा करिअरकै उत्कृष्ट प्रदर्शन गरे । उनले फ्रन्ट नाइन इभन पार ३६ मा सके । पहिलो र पाँचौँ होलको बोगीविरुद्ध उनले तेस्रो र सातौँ होलमा एक–एक सट बचाए । यसपछि ११औँ होलको बर्डीले ब्याक नाइन १–अन्डर ३५ मा सकाउँदै सूर्य नेपाल गल्फ टुरमा उनी पहिलोपटक एमेच्योरतर्फ दोस्रो भए ।