त्रिभुवन विश्वविद्यालय परीक्षा नियन्त्रण कार्यालयबाट स्नातक तह (बिए) प्रथम वर्षका १८३ परीक्षार्थीको उत्तरपुस्तिका नै हराएको छ । गत वैशाखमा परीक्षा भएको जनसंख्या र ‘फाउन्डेसन अफ एजुकेसन’ विषयको उत्तरपुस्तिका हराएको हो ।
नतिजाको प्रतीक्षामा बसेका विद्यार्थीलाई त्रिविले भने पुनः परीक्षाको बोझ थोपरिदिएको छ । उत्तरपुस्तिका हराएको विद्यार्थीका लागि त्रिविले २१ चैतमा परीक्षा मिति तोकेको छ । त्रिविका सूचना अधिकारी योगन्द्रप्रसाद दाहालले विद्यार्थीलाई मर्का परेकाले छिट्टै परीक्षा लिन लागिएको र दोषीमाथि कारबाही हुने बताए ।
उपकुलपतिको कार्यालयले पनिकाको लापर्बाहीका कारण उत्तरपुस्तिका हराएको ठहर गर्दै यसबारे छानबिन गर्न पनिकालाई नै निर्देशन दिएको छ । उपकुलपति प्रा.डा. केशरजंग बरालले नै उत्तरपुस्तिका हराउनेमाथि कारबाही गर्न छानबिन थालेका छन् । दाहालले २१ चैतमा त्रिविले तोकेको ठाउँमा गएर परीक्षा दिन विद्यार्थीलाई आग्रह पनि गरे ।