अर्थ प्रिन्ट संस्करण

निक्षेपको ब्याजदर निरन्तर ओरालो

व्यक्तिगत मुद्दतीमा औसत ब्याजदर घटेर ७.२५ प्रतिशत कायम, संस्थागत निक्षेपको ब्याजदर औसतमा बढेर ६.०९ प्रतिशत पुग्यो

वाणिज्य बैंकहरूले निक्षेपमा दिने ब्याजदर घटाउने क्रमलाई निरन्तरता दिएका छन् । बैंकमा निक्षेप थुप्रिँदै गएपछि चैत महिनाका लागि २० वटा वाणिज्य बैंकमध्ये १९ ले व्यक्तिगत मुद्दती निक्षेपको ब्याजदर घटाएका छन् । बुधबार सार्वजनिक तथ्यांकअनुसार व्यक्तिगत मुद्दती निक्षेपको औसत ब्याजदर ७.२५ प्रतिशत कायम भएको छ । फागुनमा औसत ब्याजदर ७.७५ प्रतिशत कायम थियो । गत भदौमा १०.३३ प्रतिशतसम्म पुगेको यस्तो ब्याजदर अहिले निरन्तर ओरालो लागिरहेको छ । बैंकहरूमा निक्षेप थुप्रिँदै जाने र कर्जा विस्तार पनि सुस्त भएकाले ब्याजदर घट्दो क्रममा छ । 

नेपाल राष्ट्र बैंकको तथ्यांकअनुसार गत सोमबारसम्म बैंकहरूमा कुल निक्षेप ४५ खर्ब पुगेको छ । त्यस्तै, कर्जा निक्षेपको अनुपात पनि ७९.९१ प्रतिशत कायम छ । अन्तरबैंक ब्याजदर २.९५ प्रतिशत कायम रहँदा बैंकहरू अधिक तरलताको स्थितिमा रहेको देखाउँछ । जसकारण बैंकहरूले पनि ब्याजदर घटाउनुपरेको हो । 

एनआइसी एसियाले भने ब्याजदर बढाएको छ । बैंकको वित्तीय विवरणलाई लिएर नकारात्मक प्रचार भएपछि छोटो अवधिमै बैंकबाट निक्षेप झिकिएको थियो । जसकारण बैंकले ब्याजदर बढाउनु परेको हो । फागुनमा ब्याजदर घटाएर ८ प्रतिशतसम्म पुर्‍याएको एनआइसी एसियाले चैतमा ब्याजदर बढाएर ८.५४ प्रतिशत पुर्‍याएको छ । 

व्यक्तिगत मुद्दतीतर्फ सबैभन्दा बढी ब्याजदर हुनेमा एनआइसी एसिया नै छ । आठवटा वाणिज्य बैंक सिटिजन्स, माछापुच्छ्रे बैंक, ग्लोबल आइएमई, कुमारी, हिमालयन, प्रभु, लक्ष्मी सन्राइज र सिद्धार्थ बैंकको मुद्दती ब्याजदर ७.५ प्रतिशतभन्दा बढी छ । नबिल, सानिमा र प्राइम कमर्सियल बैंकको ब्याजदर ७.२५ प्रतिशत कायम छ । नेपाल एसबिआई बैंकको ब्याजदर ७.०१ प्रतिशत पुगेको छ । एनएमबि, राष्ट्रिय वाणिज्य बैंक, नेपाल इन्भेष्टमेन्ट मेगा बैंक, स्ट्यान्डर्ड चार्टर्ड र नेपाल बैंकको ब्याजदर ७ प्रतिशत कायम भएको छ । एभरेष्ट बैंकको ब्याजदर ६.५ प्रतिशत कायम भएको छ भने कृषि विकास बैंकको ब्याजदर ५.६६ प्रतिशत छ । 

 संस्थागत निक्षेपको ब्याजदर औसतमा बढ्यो
बैंकहरूले व्यक्तिगत मुद्दतीभन्दा १ प्रतिशत विन्दुले कम ब्याजदर संस्थागत निक्षेपमा दिनुपर्ने व्यवस्था छ । चालू आर्थिक वर्षको मौद्रिक नीतिको समीक्षामार्फत राष्ट्र बैंकले २ प्रतिशत विन्दुको यो सीमालाई घटाएर १ प्रतिशत विन्दु कायम गरेको थियो । जसअनुसार अधिकांश बैंकले संस्थागत निक्षेपको ब्याजदर बढाउनुपरेको हो । 

फागुनसम्म ५.७३ प्रतिशतसम्म औसत पुगेको संस्थागत निक्षेपको ब्याजदर चैतमा भने बढेर ६.०९१ प्रतिशत कायम भएको छ । एनआइसी एसिया बैंकले संस्थागत निक्षेपमा दिने ब्याजदर १.५४ प्रतिशत विन्दुले बढाएर ७.५४ प्रतिशत पुर्‍याएको छ । अधिकांश बैंकहरूले संस्थागत निक्षेपको ब्याजदर बढाए पनि पाँच वाणिज्य बैंकले भने घटाएका छन् ।

एनएमबि, हिमालयन, एभरेष्ट, नेपाल एसबिआई र नेपाल बैंकले संस्थागत निक्षेपमा ब्याजदर घटाएका हुन् । नबिल, ग्लोबल आइएमई, कृषि विकास बैंक, सानिमा, प्रभु, कुमारी, लक्ष्मी सन्राइज, सिद्धार्थ बैंक र प्राइम कमर्सियल बैंकले यस्तो निक्षेपमा ब्याजदर बढाएका छन् । राष्ट्रिय वाणिज्य, नेपाल, इन्भेष्टमेन्ट मेगा बैंक, स्ट्यान्डर्ड चार्टर्ड, सिटिजन्स र माछापुच्छ्रे  बैंकको ब्याजदर भने स्थिर छ ।