खेलकुद डिजिटल संस्करण

हेटौँडामा अन्तर क्याम्पस टी–२० क्रिकेट प्रतियोगिता हुने

हेटौँडामा २६ फागुनबाट अन्तर क्याम्पस अष्टकुमारी टी–२० क्रिकेट प्रतियोगिता हुने भएको छ। हेटौँडा जेसिजको आयोजनामा प्रतियोगिता हुन लागेको हो।

प्रतियोगितामा मकवानपुर, बारा, पर्सा र चितवनका गरी ६ वटा क्याम्पसहरूको सहभागिता रहने आयोजक जेसिजका अध्यक्ष विकेशलाल श्रेष्ठले जानकारी दिए।

उनका अनुसार प्रतियोगितामा मकवानपुरको हेटौँडा स्कुल अफ म्यानेजमेन्ट, हेटौँडा सिटी कलेज र नारायणी कलेज, बाराको सिमरा क्याम्पस, पर्साको नेसनल इन्फोटेक र चितवनको एरोभा कलेजको सहभागिता रहनेछ।

हेटौँडा जेसिज सन् १९९२ का अध्यक्ष पूर्ण शाक्यको स्वर्गीय आमा अष्टकुमारी शाक्यको स्मृतिमा हुन लागेको प्रतियोगिताको विजेताले नगद ५० हजार रुपैयाँ र उपविजेताले २५ हजार रुपैयाँ प्राप्त गर्नेछ।

प्रतियोगिताको उत्कृष्ट खेलाडीलाई १० हजार रुपैयाँ, उत्कृष्ट ब्याटर र बलरलाई जनही ५–५ हजार रुपैयाँ पुरस्कार प्रदान गरिने प्रतियोगिता संयोजक सुमन अर्यालले जानकारी दिए। प्रतियोगिता हेटौँडा उपमहानगरपालिका वडा नम्बर ४ स्थित हुप्रचौरमा हुनेछ।