नयाँ सत्तागठबन्धनका चार दलबीच कसले कति मन्त्रालय पाउने भन्ने टुंगो लागेको छ ।
प्रधानमन्त्रीको सरकारीनिवास बालुवाटारमा बसेको चारदलीय कार्यदलले मन्त्रालयको संख्या टुंगो लगाएको हो ।
कार्यदलमा रहेका नेताहरूले दिएको जानकारीअनुसार एमालेले आठ, माओवादीले पाँच, रास्वपाले चार र जसपाले दुई मन्त्रालय पाउने भएका छन् ।
बाँकी मन्त्रालय सरकारमा पछि थपिने दलका लागि राख्ने सहमति पनि बनेको छ ।
एकीकृत समाजवादी, जनमत, लोसपा, नागरिक उन्मुक्तिलगायतका दललाई पनि सरकारमा सहभागी गराउने प्रयास प्रधानमन्त्री पुष्पकमल दाहाल र एमाले अध्यक्ष केपी ओलीले गरिरहेका छन् ।
मन्त्रालयको संख्या टुंगिए पनि अर्थबाहेक अन्य मन्त्रालय कुन–कुन मन्त्रालय कसले पाउने भन्ने टुंगो लाग्न बाँकी रहेको पनि ती नेताले जानकारी दिए ।
अर्थ भने प्रधानमन्त्री प्रचण्डको दल माओवादीले नै राख्ने भएको छ । गृहमा एमाले र राष्ट्रिय स्वतन्त्र पार्टीको बलियो दाबेदारी रहेको ती नेताले बताए ।
रास्वपाका केही नेताले भने गृह, शिक्षा, श्रम र युवा तथा खेलकुद मन्त्रालय आफूहरूले पाउने सहमति जुटिसकेको दाबी गरेका छन् ।