सहुलियत मूल्यमा औषधि उपलब्ध गराउन पुसभित्रै ‘सुलभ फार्मेसी’ चलाउने घोषणा गरेको काठमाडौं महानगरपालिकाले कार्यविधि नै बनाउन सकेको छैन । महाराजगन्ज, वीर अस्पताल, कालीमाटी, लैनचौर र क्षेत्रपाटी गरी पाँच स्थानमा फार्मेसी चलाउन विनियोजन गरिएको ६ करोड पनि खर्च हुन सकेको छैन । 

महानगरपालिका स्वास्थ्य विभागकी निमित्त प्रमुख सजिना महर्जनले फार्मेसी सञ्चालनका लागि फागुनभित्र कार्यविधि बनाइसक्ने र त्यसपछि बाँकी काम अघि बढाइने बताइन् । ‘यसअघि के कसरी सञ्चालन गर्ने भनिएको थियो, त्यसबारे मलाई थाहा भएन । कार्यविधि नै तयार नभई फार्मेसी सञ्चालन गर्न सकिँदैन,’ उनले भनिन्, ‘कार्यविधिको मस्यौदा बनिरहेको छ । त्यसपछि विज्ञ र सरोकारवालासँग छलफल हुन्छ ।’ तत्कालीन स्वास्थ्य विभाग प्रमुख रामप्रसाद पौडेल विवादमा मुछिएपछि निलम्बनमा छन् । 

कार्यविधिबाट फार्मेसी सञ्चालनसँगै के–कस्ता औषधि बिक्री गर्ने भन्नेबारे तय गर्नेछ । महानगरले यसअघि फार्मेसी सञ्चालनका लागि  दुई हजार एक सय ६४ प्रकारका औषधिबारे अध्ययन पनि गरेको थियो । सरकारी निकायका फार्मेसीमा सबै किसिमका औषधि नपाइने भएकाले महानगरले सबै औषधि राख्न खोजेको हो । फार्मेसीका लागि औषधि सप्लायर्स कम्पनीसँग पनि समन्वय, सफ्टवेयर निर्माण काम भएको महानगरले जनाएको छ ।  

घर भाडामा भेटिएनन्
महानगरले फार्मेसी सञ्चालनका लागि घर भाडामा खोजे पनि अझै भेटेको छैन । ५ पुसमा सार्वजनिक सूचना जारी गरी महानगरले ‘१५ दिनभित्र मासिक के–कति दरमा दिन सकिने हो, सो उल्लेख गरी गोप्य सिलबन्दी खामसहित दर्ता गराउन’ भनेको थियो । तर, महानगरले खोजेको क्षेत्र ‘प्राइम लोकेसन’मा घर भाडामा पाइएको छैन । बबरमहलमा भने महानगरपालिका–११ को वडा कार्यालय रहेको भवनको एक तलामा सुलभ फार्मेसी राख्ने तयारी भएको छ । सुलभ फार्मेसीमा बजारमा अहिले पाइने औषधिभन्दा सस्तो हुने महानगरको दाबी छ । महानगरभित्र हाल सरकारी र निजी गरी दुई हजार सात सय फार्मेसी छन् । उपत्यकाभर चार हजार सात सय फार्मेसी छन् ।