नागार्जुन नगरपालिकाको उमागाउँमा पञ्चकन्या देवीको मन्दिर बनाइने भएको छ। सातौँ शताब्दीकै शिलालेखमा उल्लेख भएका शक्तिपीठमध्येको पञ्चकन्या देवीको मन्दिर निर्माण गर्ने तयारी गरिएको हो।
पञ्चकन्या देवीस्थाननजिकै सन्दुक आकारमा चारपाटे ढुंगा रहेको यसलाई हातले बजाउँदा मादलको जस्तो ध्वनि आउने हुनाले यसको प्रवर्द्धन पनि गर्ने उद्देश्य रहेको स्थानीय सन्तोष गिरीले बताए। सोही ढुंगाको भित्तापट्टि ब्रह्मलिपिमा कुँदिएका अक्षर हालसम्म कसैले पढ्न नसकेकाले यसको पुरातन महत्त्व रहेको उनको भनाइ छ।
देवीको महिमा र यस क्षेत्रको प्रचारप्रसारका लागि स्थानीय समुदायको चाहनाअनुरूप श्री पञ्चकन्या देवी सप्ताह ज्ञान महायज्ञ आयोजना गरिएको आयोजकको भनाइ छ। महायज्ञ २६ माघदेखि चार फागुनसम्म हुने गिरीले बताए।