Skip This
भारतको अयोध्यामा नवनिर्मित राम मन्दिरको प्राण प्रतिष्ठाका अवसरमा नेपालको जनकपुरधामबाट सुन–चाँदीका गरगहनासहित १५ सयभन्दा बढी भार पठाइएको छ ।
विश्वप्रसिद्ध जानकी मन्दिर र जनकपुरधाम उपमहानगरपालिकाको अगुवाइमा जनकपुरधामबाट कोसेलीका रूपमा सुन तथा चाँदीबाट निर्मित गरगहना, चाँदीका धनुषवाण र पादुका, वस्त्र, आभूषण, फर्निचर, भाँडावर्तन, मिठाई, फलफूल, चुरा, चामलसहितका परिकार अयोध्या पठाइएको हो ।
भार लिएर अयोध्या जाने टोलीलाई मधेश प्रदेशका मुख्यमन्त्री सरोजकुमार यादव, जानकी मन्दिरका महन्थ रामतपेश्वर दास वैष्णव, पूर्वउपप्रधानमन्त्री एवं कांग्रेस नेता विमलेन्द्र निधिसहित स्थानीय नागरिकले भव्य बिदाइ गरे ।
स्थानीयवासीले आ–आफ्ना घरबाट अयोध्या पठाउन विभिन्न परिकारका भार तयार गरी जानकी मन्दिरको जिम्मा लगाएका थिए । बिदाइ कार्यक्रममा मुख्यमन्त्री यादवले यस्ता क्रियाकलापले नेपाल–भारतको सम्बन्ध अझ प्रगाढ हुने बताए । जनकपुरधामबाट भार टोली जलेश्वरबाट हुलाकी सडक भएर मलंगवा, गौर, कलैया हुँदै बिहीबार मध्यरात वीरगन्ज पुगेको छ ।
