हुम्लाको सिमकोट गाउँपालिका– ५ स्थित एक घरमा मंगलबार बिहान आगलागी भएको छ।
नेपाली कांग्रेस जिल्ला पार्टी उपसभापतिसमेत रहेका स्थानीय वसन्त रोकायाको घरमा बिहान ९ बजे आगलागी भएको हो। आगलागीबाट घरको तेस्रो तला पूरै जलेर नष्ट भएको छ।
नेपाली सेना, सशस्त्र प्रहरी बल, नेपाल प्रहरी र स्थानीयवासीले आगो नियन्त्रणमा लिने प्रयास गरिरहेका छन्। आगो पूर्ण नियन्त्रणमा आउन सकेको छैन।
आगलागीको कारणबारे जानकारी आउन बाँकी रहेको जिल्ला प्रहरी कार्यालय हुम्लाले बताएको छ। क्षतिको यकिन विवरणसमेत आइसकेको छैन।