खेलकुद प्रिन्ट संस्करण

विश्वकप छनोटमा नेपालको लगातार दोस्रो हार

एसियन छनोटअन्तर्गत दोस्रो चरणमा नेपाल दशरथ रंगशालामा यमनसँग २–० ले पराजित

फिफा विश्वकप–२०२६ अन्तर्गत एसियन छनोट नेपाल मंगलबार यमनसँग २–० ले पराजित भएको छ । घरेलु मैदान दशरथ रंगशालामा नेपालले प्राप्त अवसर सदुपयोग गर्न नसक्दा यमनलाई नतिजा सुम्पिएको हो । पहिलो हाफमा दुवै टोलीबीच गोलरहित बराबरी भएको थियो । यमनले ७२औँ र ९०औँ मिनेटमा गोल गर्दै विश्वकप छनोटमा महत्वपूर्ण दुई अंक बटुल्न सफल भयो । यमनलाई जित दिलाउने क्रममा ओमर अब्दुल्लाह अल दाही र मोहम्मद अल्दुल्लाह अलले एक–एक गोल गरेका थिए । समूह ‘एच’मा रहेको नेपालले आफ्नो दुवै खेल गुमाएको छ । नेपाल अंकविहीन छ । यमनले दुई खेलबाट दुई अंक जोडेको छ । 

यसअघि नेपाल पहिलो खेलमा युनाइटेड अरब इमिरेट्स (युएई)सँग ४–० ले पराजित भएको थियो । पहिलो जित निकालेको यमन तेस्रो स्थानमा छ । यस समूहमा नेपालसँगै युएई, यमन र बहराइन छन् । त्यसअघि छनोटको पहिलो चरणमा नेपालले लाओसलाई समग्रमा २–१ ले पराजित गरेको थियो । खेलको ७३औँ मिनेटमा ओमर अब्दुल्लाह अलदाहीले डिबक्सनजिकै पहिलो बारमा उत्कृष्ट गोल गर्दे दशरथ रंगशालामा उपस्थित १३ हजार सात सय ३५ जना दर्शकलाई स्तब्ध बनाएका थिए । उनले पेनाल्टी बक्सको बाहिर दायाँ साइडमा नेपालका तीन डिफेन्डरलाई बिट गर्दै टप कर्नर उत्कृष्ट गोल गरेका थिए । 

उनको प्रहार छेक्न नेपालका गोलरक्षक तथा कप्तान किरण लिम्बूले मौका नै पाएनन् । खेलको ९०औँ मिनेटमा यमनले २–० को अग्रता लिँदै जित सुनिश्चित गर्‍यो । यसपटक मोहम्मद अब्दुल्लाह अलले गोलरक्षक लिम्बूमाथि चिप गर्दै जित सुनिश्चित गरेका हुन् । 

यमनको आक्रामक खेल
दशरथ रंगशालामा पहिलो मिनेटदेखि यमन आक्रमण देखियो । यमनले नेपालका डिफेन्डरलाई डिफेन्स लाइनमा व्यस्त बनाउने योजना बुनेका थिए । यद्यपि, नेपालले काउन्टर एट्याक्टमा यमनमाथि दबाब बनाउने कोसिस गरेको थियो । खेलको चौथो मिनेटमा दायाँ साइडबाट दुई डिफेन्डरलाई काट्दै दिनेशले निकालेको क्रसमा आशिषको हेडिङ यमनका गोलरक्षक अब्दुल्लाह अललवे नियन्त्रणमा लिन सकेनन् । रिबाउन्डमा जिलेस्पीले हेडिङ गोल गरे पनि रेफ्रीले अफसाइडको इसारा गरेका थिए । खेलको १५औँ मिनेटसम्म नेपाल र यमनले राम्रो फिनिसिङ गर्न सकेका थिएनन् । खेलको १६औँ मिनेटमा यमनका अहमेद महेरले मैदानको मध्य भागबाट एक्लै अगाडि बढाएको बललाई नेपालका गोलरक्षक लिम्बूले नियन्त्रणमा लिए । 

खेलको २६औँ मिनेटमा हम्जाह हनासले पेनाल्टी बक्सबाट गरेको प्रहार नेपाली गोलरक्षक लिम्बूले सहजै बचाएका थिए । खेलको ३३औँ मिनेटमा बायाँ साइडबाट अहमद माहेरले दुई नेपाली रक्षकलाई बिट गर्दै गरेको प्रहार गरेको बल आकासिएको थियो ।

मध्यान्तरपछि सुधारिएको प्रदर्शन
पहिलो हाफको तुलनामा दोस्रो हाफमा नेपालको प्रदर्शनमा सुधार देखियो । मध्यान्तरमा नेपालले एउटा निकै राम्रो गोल अवसर प्राप्त गरेको थियो । तर, फिनिसिङ गर्ने खेलाडीले गतिलो प्रहार गर्न नसक्दा नेपालले खेलमै पहिलोपटक अग्रता लिने अवसर गुमायो । खेलको ६१औँ मिनेटमा हिसुब थपलियाले सुन्दर मौका खेर फाले ।

यमनका गोलरक्षम अब्दुल्लाहविरुद्ध वान अन वान मौका उनले खेर फालेका हुन् । उनको प्रहार सीधै गोलरक्षकको काँधमा लागेको थियो । त्यसलगत्तै पेनाल्टी बक्सबाहिरबाट पाएको फ्रिकिकमा पुनः नेपालले अग्रताको अवसर गुमायो । जिलेस्पीलाई बक्सबाहिर लडाएपछि प्राप्त फलमा नेपालका एरिक विष्टको प्रहारले पोस्टको दिशा लिन सकेन ।

प्रदर्शन सोचेजस्तो भएन
भिसेन्जो एनेस, प्रशिक्षक, नेपाल
यमनसँगको खेलमा मैले यो प्रदर्शन अपेक्षा गरेको थिइनँ । हाम्रो नजरमा ९० मिनेट खेलमा महत्वपूर्ण थियो । प्रतिस्पर्धाअघि नै धेरै खेलाडी इन्जुरी भए । हामीले हामो क्षमताअनुसार फुटबल खेलेनौँ । हिसुबले यमनका गोलरक्षकविरुद्ध वान भर्सेस वाजमा गोल गरेनन् । त्यो गोल भए खेलको नतिजा अर्कै हुन्थ्यो । यस खेलमा हाम्रो फिजिकल धेरै कमजोरी भयो । यमनले गरेको दुवै गोल निकै सुन्दर थियो । हामीले अर्काे गल्ती गर्‍यौँ उनीहरूले अर्काे गोल थपे ।   
अपेक्षाअनुरूप नतिजा थियो

 मिरोस्लाभ साउकुप, प्रशिक्षक, यमन
हामीले नेपाललाई कडा विपक्षीका रूपमा लिएका थियौँ । उनीहरूसँग खेल्दा प्रतिस्पर्धामक खेल हुने अपेक्षा गरेका थियौँ । वास्तवमा आजको खेलमा त्यस्तै भयो । खेलाडी परिवर्तनपछि गोल निस्कियो । यस जितबाट हामी खुसी छौँ । अघिल्लोपटक बहराइनसँग खेलेका खेलाडीले नेपालविरुद्ध थप उत्कृष्ट खेलेका छन् । हामीले गरेका दुई गोल निकै राम्रो थियो ।