Skip This
नेपाल नागरिक उड्डयन प्राधिकरणले दुई पाइलटको लाइसेन्स सस्पेन्स गरेको छ। प्राधिकरणले तारा एयरका वरिष्ठ क्याप्टेन सन्तोष शाह र अर्का क्याप्टेन सञ्जीव श्रेष्ठको लाइसेन्स सस्पेन्स गरेको हो।
आज (शुक्रबार) बिहान रामेछापको मन्थली विमानस्थलमा तारा एयरका दुई पाइलटबीच कुटाकुट भएको थियो। सोही विषयलाई लिएर प्राधिकरणले उनीहरूको लाइसेन्स सस्पेन्समा राखेर उनीहरूबारे थप अनुसन्धान भइरहेको जनाएको छ।
क्याप्टेनशाह आज बिहान ८ बजे सोलुको लुक्लाबाट जहाज लिएर मन्थली विमानस्थलमा अवतरण गरेका थिए भने अर्का क्याप्टेन श्रेष्ठ लुक्ला उडानका लागि विमानस्थलमा रहेको जहाजतर्फ जाँदै थिए।
लुक्लाबाट मन्थली आएका क्याप्टेन शाह जहाजबाट ओर्लिएर बाहिर निस्केर हिँड्दै गर्दा जहाज भएको ठाउँतर्फ अर्का क्याप्टेन श्रेष्ठ जाँदै थिए। दुईजनाको भेटमा क्याप्टेन शाहले अर्का क्याप्टेन श्रेष्ठसँग हात मिलाउन खोज्दा श्रेष्ठले शाहलाई एक चड्कन गालामा हानेर धकेलिदिएपछि क्याप्टेन शाह भुइँमा बजारिन पुग्दा सामान्य घाइते भएका छन्।
