- वि.सं २o८o भदौ २६ मंगलबार
हृदयघातबाट निधन भएका नेकपा (एमाले)का उपाध्यक्ष एवं संसदीय दलका उपनेता सुवासचन्द्र नेम्वाङको पार्थिव शरीर अहिले केहीबेरमा ललितपुरकाे च्यासलस्थिल पार्टी कार्यालयमा राखिने भएको छ ।
बालुवाटारस्थित आफ्नो निजी निवासमा गएराति उनलाई हृदयघात भएपछि उपचारका लागि महाराजगन्जस्थित शिक्षण अस्पताल पुर्याइएकामा त्यहीँ नेम्वाङको निधन भएको थियो ।
स्नातक अध्ययनका क्रममा ०२८/२९ सालमा अनेरास्ववियुबाट राजनीतिक यात्रामा प्रवेश गरेका नेम्वाङ इलाम बहुमुखी क्याम्पसको स्ववियु सभापति भएका थिए ।
०३३ सालमा राजकाज मुद्दामा केन्द्रीय कारागारमा थुनामा रहँदा कम्युनिस्ट पार्टी कोअर्डीनेसन केन्द्र (मा)मा संगठित एमाले केन्द्रीय न्यायिक समिति सदस्य हुँदै एमालेको उपाध्यक्षको जिम्मेवारी सम्हाल्दै आएका थिए ।
०४८ देखि ०५२ सम्म राष्ट्रिय सभा सदस्य, ०५६, ०६४, ०७०, ०७४ र ०७९ मा इलाम– २ बाट प्रतिनिधिसभा सदस्यमा निर्वाचित नेम्वाङ पार्टी संसदीय दलको उपनेता र पार्टी उपाध्यक्षको जिम्मेवारीमा थिए ।
नेम्वाङ ०६३ मा पुनर्स्थापित प्रतिनिधिसभाका सभामुख, ०६४ व्यवस्थापिका संसद्को सभामुख, ०६५ एवं ०७० सालमा संविधानसभाका अध्यक्ष र सभामुख थिए ।
०३२ देखि ०६३ सम्म मुलुकमा भएको राजनीतिक आन्दोलनमा पटकपटक गरी सात महिना थुनामा रहेका नेम्वाङ ०५१ सालमा कानुन, न्याय तथा संसदीय मामिलामन्त्री, सामान्य प्रशासनमन्त्री, सार्वजनिक लेखासमितिको सभापतिको जिम्मेवारी सम्हालेका थिए ।
त्यसैगरी ०३५ देखि ०४२ सम्म नेपाल ल क्याम्पसमा प्राध्यापन गरेका स्व. नेम्वाङ वरिष्ठ अधिवक्तासमेत रहेका थिए ।
