मुख्य समाचार प्रिन्ट संस्करण

पदाधिकारी बैठकमा देउवाको प्रस्ताव– केन्द्रीय समिति बैठक लाइभ गरौँ 

कांग्रेस पदाधिकारी तथा पूर्वपदाधिकारीसँगको छलफलका क्रममा सभापति शेरबहादुर देउवाले पार्टीको  केन्द्रीय समिति बैठक प्रत्यक्ष प्रसारणको प्रस्ताव गरेका छन् । पूर्वमहामन्त्री डा. शशांक कोइरालाका अनुसार बैठकको सुरुमा नै यसबारे छलफल भएको थियो । तर, यसबारे फरकफरक धारणा रहेको उनले बताए ।

‘सुरुमा शेरबहादुरजी आफैँले बैठक लाइभ गरौँ भन्नुभयो । धेरैले लाइभ गरे पनि हुन्छ भन्नुभयो । केहीले लाइभ हुने भएपछि हृदयबाट कुरा राख्न सक्दैनन्, सहमति–असहमतिका विषय राख्न सहज हुँदैन भन्नुभयो,’ कोइरालाले भने, ‘दुवै पक्षका कुरा भए । कतिपयले गरी हेरौँ त्यसको रिपोर्टका आधारमा गर्ने–नगर्ने निर्णय गरौँला भन्नुभएको छ । सायद सुरुमा बैठक लाइभ नै हुन्छ । त्यसको प्रतिक्रियाका आधारमा के गर्ने टुंगो लाग्छ ।’

महामन्त्री विश्वप्रकाश शर्माका अनुसार बैठक प्रत्यक्ष गर्ने–नगर्नेबारे मंगलबार नै टुंगो लाग्नेछ । ‘पार्टीको छलफल बन्द रूपमा हुने र छलफलका लागि सहज हुने परम्परा छ । तर, कांग्रेसले प्रविधिलाई प्रयोग किन नगर्ने भन्ने विषयमा छलफल भयो । हुन पनि सक्छ, नहुन पनि सक्छ । मंगलबार नै टुंगो लाग्छ,’ उनले भने । 

११ महिनापछि मंगलबार (आज) कांग्रेस केन्द्रीय समिति बैठक बस्दै छ । महामन्त्री विश्वप्रकाश शर्माका अनुसार बैठकमा १० एजेन्डा रहनेछन् । राष्ट्रिय महत्वका र पार्टी जीवनका कैयौँ मुद्दामा कांग्रेसका संस्थापन र इतर समूहबीच एकरूपता छैन । बैठकको पूर्वसन्ध्यामा सोमबार सभापति शेरबहादुर देउवानिवास धुम्बाराहीमा पदाधिकारी तथा पूर्वपदाधिकारीसँग छलफलपछि एजेन्डा तय भएका हुन् ।