समाचार डिजिटल संस्करण

हिसान शैक्षिक मेला पुनः सञ्चालन हुने

उच्च अदालत पाटनको अन्तरिम आदेशका आधारमा उच्च शिक्षालय तथा माध्यमिक विद्यालय संघ नेपाल (हिसान) र कान्तिपुर पब्लिकेसन्स लिमिटेडको संयुक्त आयोजनामा यही असार ८ गतेदेखि पुनः शैक्षिक मेला (एडुफेयर) हुने भएको छ।

‘उत्कृष्ट शिक्षा नेपालमै’ भन्ने नाराका साथ आयोजित चारदिने मेलाको पहिलो दिन गत जेठ ३२ गते काठमाडौं महानगरपालिकाका प्रमुख बालेन साहको मौखिक आदेशमा नगर सुरक्षाकर्मीको अवरोध गरेपछि मेला स्थगन भई आयोजक अदालत पुगेका थिए।

बुधबारको अन्तरिम आदेशसँगै अब मेला असार ८, ९ र १० गते पुनः सञ्चालन हुने आज मेलास्थल भृकुटीमण्डपमा आयोजित पत्रकार सम्मेलनमा हिसानका अध्यक्ष रमेश सिलवालले बताए। उनले महानगरको हस्तक्षेप गैरकानुनी भन्ने अदालतको व्याख्या आइससकेकाले निर्वाध रूपमा मेला सञ्चालन हुने जनाउँदै अवरोधका कारण भएको आर्थिक र मानसिक क्षतिपूर्तिका लागि अदालतको अन्तिम सुनुवाइ पर्खने उल्लेख गरे।

विद्यार्थी र अभिभावकको विदेश जाने मोहका कारण ठूलो धनराशि बिदेसिएको अवस्थामा नेपालकै उत्कृष्ट शिक्षालयबारे विस्तृत जानकारी दिन मेला उपयोगी हुने उनको भनाइ छ। एक प्रश्नको जवाफमा उनले मेलाको पहिलो दिन कुनै पनि कलेजले विद्यार्थीको भर्ना लिने वा शुल्क लिने काम नगरेको जिकिर गर्दै त्यस्तो पाइए सार्वजनिक गर्न माग गरे।

महानगरपालिकाले लिखित जानकारीविना एका–एक मेला अवरोध गराइएको भन्दै निजी शिक्षा क्षेत्रका संस्थाले ध्यानाकर्षण गराएका थिए । मेलाका लागि शिक्षा, विज्ञान तथा प्रविधि मन्त्रालयबाट स्वीकृति लिइएको हिसानले जनाएको छ । मेलामा नेपालमै सञ्चालित शिक्षालयले दिने गुणस्तरीय तथा उत्कृष्ट शिक्षाबारे सत्य, तथ्य र यथार्थ जानकारी र परामर्श दिइने मेलाका संयोजक टंकराज आचार्यले जानकारी दिए।

मेलामा विद्यालय तहका संस्था, काठमाडौं विश्वविद्यालय, पोखरा विश्वविद्यालय, पूर्वाञ्चल विश्वविद्यालय, मध्यपश्चिम विश्वविद्यालय, प्राविधिक शिक्षा तथा व्यावसायिक तालिम परिषद्को सम्बन्धनमा सञ्चालित ७५ भन्दा बढी संस्थाको सहभागिता रहने र दुई लाखभन्दा बढीले अवलोकन गर्ने जनाइएको छ । मेलामा प्रवेश निःशुल्क गरिएको छ भने एक हजारभन्दा बढी विद्यार्थीका लागि पूर्ण र आंशिक छात्रवृत्तिको व्यवस्था गरिएको उनले बताए।