- वि.सं २o८o जेठ २६ शुक्रबार
काठमाडौं महानगरपालिकाका मेयर बालेन्द्र साहले कार्यकक्षमा ‘ग्रेटर नेपाल’ समेटिएको नक्सा राखेका छन् । मेयर साह भारत भ्रमणमा रहेका वेला उनको टिमले कार्यकक्षमा ‘ग्रेटर नेपाल’को नक्सा राखेको हो ।
करिब दुई साताअघि भारतले ‘अखण्ड भारत’को नाममा नेपालका केही भूभागसमेत समेटिएको नक्सा नयाँ संसद् भवनमा राखेको थियो । मेयर साहले त्यसलगत्तै ग्रेटर नेपालको नक्सा बनाउन दिएका थिए । नक्सा तयार भएपछि कार्यकक्षमा राखिएको उनका स्वकीय सचिव भूपदेश साहले बताए । उनका अनुसार मेयर साहकै इच्छाअनुसार नक्सा राखिएको हो ।
उनले भने, ‘आफ्नो भूभाग समेटिएको नक्सा राख्नु स्वाभाविक हो, नेतृत्वमा हुनेले भूभाग जोगाउनुपर्छ ।’ ग्रेटर नेपालको नक्सामा पूर्वमा टिस्टा नदीदेखि पश्चिममा काँगडासम्मको भूभाग समेटिएको छ । तर, यो भूभाग सुगौली सन्धिपछि भारतको नियन्त्रणमा छ ।
