उपराष्ट्रपतिमा एउटै उम्मेदवार बनाउन गठबन्धन असफल

प्रधानमन्त्रीले भने–यो गठबन्धनको यात्रा लामो छ, गठबन्धन एक रहेको सन्देश दिन पनि एकजना मात्र उम्मेदवार बनाएर जाऔँ

सत्तागठबन्धनमा रहेका दलहरू उपराष्ट्रपतिमा एक मात्रै उम्मेदवार बनाउने प्रयासमा असफल भएका छन् । बुधबार साँझ प्रधानमन्त्रीनिवास बालुवाटारमा बसेको सत्तागठबन्धनको बैठकमा उपराष्ट्रपतिको उम्मेदवारको विषयमा सहमति जुट्न सकेन ।

शुक्रबार उपराष्ट्रपतिको निर्वाचन हुँदै छ । उपराष्ट्रपतिमा गठबन्धनमा रहेका दल जसपाबाट रामसहायप्रसाद यादव र जनमतबाट ममता झाको उम्मेदवारी छ । बैठकमा प्रधानमन्त्री पुष्पकमल दाहाल प्रचण्डले गठबन्धनबाट एउटै उम्मेदवार बनाएर जानुपर्नेमा जोड दिएका थिए । कांग्रेस सभापति शेरबहादुर देउवा र एकीकृत समाजवादीका अध्यक्ष माधवकुमार नेपालले पनि एउटै उम्मेदवार बनाएर जानुपर्ने बताएका थिए । तर, जनमतका अध्यक्ष सिके राउतले उपराष्ट्रपति महिला हुनुपर्ने भन्दै आफ्नो पार्टीका तर्फबाट उम्मेदवारी कायमै रहने अडान लिए । 

बैठकमा प्रधानमन्त्री प्रचण्ड, कांग्रेस सभापति शेरबहादुर देउवा र एकीकृत समाजवादीका अध्यक्ष माधवकुमार नेपालले गठबन्धनबाट एउटै उम्मेदवार बनाएर जानुपर्नेमा जोड दिएका थिए । तर, जनमतका अध्यक्ष सिके राउतले उपराष्ट्रपति महिला हुनुपर्ने भन्दै आफ्नो पार्टीका तर्फबाट उम्मेदवारी कायमै रहने अडान लिए ।

प्रधानमन्त्री प्रचण्डले बैठकमा भनेको उद्धृत गर्दै एक नेताले भने, ‘प्रधानमन्त्रीले गठबन्धन एक रहेको सन्देश दिन उपराष्ट्रपतिमा साझा उम्मेदवार बनाएर जानुपर्छ । यो गठबन्धनको यात्रा लामो छ, त्यसकारण गठबन्धनबाट एकजना मात्र उम्मेदवार बनाएर जाऔँ ।’ प्रचण्डको भनाइमा देउवा र नेपालले समर्थन गर्दै एकजुट भएर जानुपर्नेमा जोड दिएका थिए । ‘हामीले पूर्वसहमतिअनुसार निर्णय गरिसकेका छौँ । हामी एकजुट भएर जानुपर्छ । विपक्षीहरूले खेल्ने ठाउँ दिनुहुँदैन,’ देउवाको भनाइ उद्धृत गर्दै ती नेताले भने । 

नेपालले राष्ट्रपतिमा जस्तै उपराष्ट्रपतिमा पनि गठबन्धनले एकताको सन्देश दिनुपर्ने बताएका थिए । ‘राष्ट्रपतिमा विभिन्न हल्ला चलेका थिए । हामीले एकताको राम्रो सन्देश दियौँ । अब उपराष्ट्रपतिको निर्वाचनमा पनि हामीले त्यस्तै सन्देश दिनुपर्छ,’ नेपालको भनाइ उद्धृत गर्दै एक नेताले भने । जसपा अध्यक्ष उपेन्द्र यादवले संविधानमा वा भएकाले राष्ट्रपति र उपराष्ट्रपति समुदाय फरक हुनु संविधानसम्मत नै हुने बताएका थिए । ‘हाम्रो उम्मेदवारी संविधानअनुसार नै हो । केही गडबड हुन्छ कि भनेर हामीले महिला उम्मेदवार पनि अघि सारेका थियौँ । सर्वोच्चले रिट नै दरपिठ गरिसकेपछि हाम्रोतर्फबाट एकजना मात्रै उम्मेदवार कायम हुनुभएको छ । गठबन्धनमा सहमति गरेर एकताको सन्देश दिऔँ ।’

उन्मुक्तिको जोड महिला उम्मेदवारमै
बैठकमा लोसपा अध्यक्ष महन्थ ठाकुरले पनि सहमतिमै जोड दिएका थिए । तर, जनमतका अध्यक्ष राउत र नागरिक उन्मुक्तिकी अध्यक्ष रञ्जिता श्रेष्ठले उपराष्ट्रपतिमा महिला उम्मेदवार हुनुपर्ने बताएका थिए । ‘संविधानको मर्म र जनताको चाहनाअनुसार पनि गठबन्धनले महिला उम्मेदवारलाई अघि सार्नुपर्छ । पुरुष उम्मेदवार हुँदा राम्रो सन्देश गएको छैन । हामी पनि गठबन्धनमा एकताकै पक्षमा छौँ,’ राउतको भनाइ थियो । उनले ममता झाको पक्षमा सहमति खोज्न शीर्ष नेताहरूसँग आग्रह गरेका थिए । श्रेष्ठले पनि महिला उम्मेदवार बनाएर जाँदा राम्रो सन्देश जाने बताएकी थिइन् । 

बैठकपछि माओवादी उपमहासचिव शक्ति बस्नेतले छलफल सकारात्मक रूपमा अघि बढेको र बिहीबार पुनः बैठक बसेर निष्कर्षमा पुग्ने बताए । उनले भने, ‘उपराष्ट्रपति उम्मेदवारमा समझदारी कायम गर्ने विषयमा छलफल भयो । छलफल सकारात्मक भएको छ । भोलि फेरि बैठक बस्छ ।’ 

उनका अनुसार बिहीबार आन्तरिक र दुईपक्षीय छलफलपछि गठबन्धनको बैठक बस्नेछ । गठबन्धनबाट उपराष्ट्रपतिमा जसपाका रामसहाय यादव र जनमतकी ममता झा उम्मेदवार छन् । कांग्रेसले यादवलाई मत दिने निर्णय गरिसकेको छ । झालाई लोसपा, नागरिक उन्मुक्ति र जनमतको समर्थन छ ।