- वि.सं २o७९ फाल्गुण २८ आइतबार
हुलाकी राजमार्गअन्तर्गत सिराहा–धनुषा जिल्ला जोड्न कमला नदीमा विगत ११ वर्षदेखि निर्माणाधीन अवस्थामै अलपत्र परेको कमला नदीको पुलको डाइभर्सन अझै बनेको छैन।
गत फागुन १५ मा उपप्रधान, भौतिक पूर्वाधार तथा यातायातमन्त्री नारायणकाजी श्रेष्ठले भासिएको कमला नदीको पुल निरीक्षण गर्दै तत्काल सवारीसाधन गुड्ने गरी ह्युमपाइप राखेर डाइभर्सन बनाउन दिएको निर्देशन निर्माण कम्पनीले पूरा गरेको छैन।
दलबलसहित निरीक्षण गर्न पुगेका मन्त्री श्रेष्ठले एक-दुई दिनमै ह्युमपाईप राखेर डाइभर्सन बनाएर सवारीसाधन गुड्ने बाटो बनाउन निर्माण कम्पनी लुम्बिनी बिल्डर्सलाई निर्देशन दिएका थिए।
मन्त्री श्रेष्ठले दिएको निर्देशनको दुई साता बितिसक्दा पनि ह्युमपाइप राखेर डाइभर्सन नबनेको सिराहा नगरपालिका– ६ का रामचन्द्र यादवले बताए।
निर्माण व्यवसायीले तत्काल डाइभर्सन नबनाएमा मन्त्रालयले आफैँले कमला नदीमा आवतजावत सहज बनाउन ह्युमपाइप राखेर डाइभर्सन बनाउने बताएका थिए। ह्युमपाइप राखेर कमला नदीमा डाइभर्सन बनाउन सात थान ह्युमपाईप निर्माण स्थलमा पुगे पनि काम अगाडि बढेको छैन।
यस्तै, मन्त्री श्रेष्ठले दुई सातामा कमला नदीको भासिएको पुल निर्माण काम सुरु हुने बताएका थिए। मन्त्रीकाे निर्देशन र घोषणाका बाबजुद कमला नदीमा पुल निर्माण कार्यले गति लिन सकेको छैन। अहिले दुवै जिल्लाका स्थानीय बाँसको अस्थायी पुलबाट जोखिमपूर्ण यात्रा गर्न बाध्य रहेका छन्।
११ वर्षदेखि बन्दै पक्की पुल
हुलाकी राजमार्गअन्तर्गत सिराहा–धनुषा जिल्ला जोड्ने गरी चार सय ७० मिटर लम्बाइको कमला नदीमा पक्की पुल निर्माण कार्य विगत ११ वर्षदेखि जारी छ।
०७८ साल असार १७ मा समान्य बाढीले कमला नदीको पुलको सिराहातर्फबाट पहिलो पाया भासिएपछि पुल अलपत्र परेको छ।
पप्पु कन्स्ट्रक्सन लुम्बिनी बिल्डर्सले करिब २५ करोडमा तीन वर्षमा निर्माण पूरा गर्ने गरी संयुक्त रूपमा ठेक्का सम्झौता गरे पनि अहिलेसम्म निर्माण पूरा हुन सकेको छैन। यस अवधिमा सिराहातर्फको एक र धनुषातर्फको एक गरी दुईवटा पाया भासिएको छ।
