लुम्बिनी प्रदेशको मुख्यमन्त्री कार्यालय स्थायी राजधानी भालुवाङ सारिएको छ । यसअघि अस्थायी मुकाम बुटवलबाट काम गर्दै आएको कार्यालयले अब भालुवाङबाटै काम थाल्नेछ । सोमबार राति ११ देखि १२ बजेसम्म बुटवलबाट सबै सामग्री दाङ ल्याइएको हो ।
मुख्यमन्त्री कार्यालयका सम्पूर्ण फर्निचर, कागजपत्र र सचिवालयको सामान तीनवटा ट्रकमा दाङ ल्याइएको हो । दाङको राप्ती गाउँपालिका– ३ स्थित राप्ती प्राविधिक शिक्षालयलाई सरस्वती माविमा सारिएपछि त्यहाँ मुख्यमन्त्रीको कार्यालय, आवासगृह र मुख्यसचिवको कार्यालय निर्माण कार्य भएको थियो ।
मुख्यमन्त्रीका प्रेस संयोजक मानसिंह विकका अनुसार आगामी आइतबारदेखि मुख्यमन्त्रीको कार्यालले देउखुरीबाटै सेवा प्रवाह गर्नेछ । बुटवलस्थित अस्थायी मुकाम बन्द गरिएको छ । यही हप्ताभित्र आन्तरिक मामिला, कानुन तथा सञ्चार मन्त्रालय, अर्थ मन्त्रालय र कोष लेखा नियन्त्रण कार्यालय पनि ल्याउने तयारी गरिएको छ ।
आज (मंगलबार) बिहान ११ बजेतिर राजधानी व्यवस्थापन मूल समितिको बैठक बस्दै छ । त्यही बैठकले के–के गर्ने भन्ने छलफल हुने राप्ती गाउँपालिका अध्यक्ष प्रकाश विष्टले जानकारी दिए । साथै नवनिर्वाचित प्रदेश सभा सदस्यहरूलाई भालुवाङमै शपथ खुवाउनेसमेत तयारी गरिएको छ । प्रदेश सभा भवनसमेत निर्माणको अन्तिम चरणमा छ ।
०७७ असोज २० गतेको प्रदेश सभा बैठकले दाङको राप्ती गाउँपालिका, गढवा गाउँपालिका वडा नं. १, २ र ३ तथा अर्घाखाँचीको शीतगंगा नगरपालिका वडा नं. ८ र ९ लाई केन्द्र मानेर स्थायी राजधानी तोकेको थियो ।
०५० सालमा स्थापना भएको राप्ती गाउँपालिका– ५ स्थित राप्ती प्राविधिक शिक्षालय १६ बिघा क्षेत्रफलमा फैलिएको छ । जहाँ अहिले तीन सयजना अटाउन सक्ने एउटा सभाहलसमेत छ । त्यहाँ साना–ठूला गरेर ३५ वटा भवन रहेको राप्ती गाउँपालिका अध्यक्ष प्रकाश विष्टले बताए ।