युरिया मलमा भएको कालोबजारीकाे छानबिन गरी दोषीलाई कारबाही गर्न माओवादी केन्द्रकाे माग

उदयपुरकाे कटारीमा नगरपालिकामा रसायनिक मल युरियामा भएको कालोबजारीकाे नेकपा (माओवादी केन्द्र) कटारी नगर कमिटीले दोषीलाई छानविन गरी कारवाही गर्न माग गरेको छ ।

गएको विहीबार जिल्ला प्रशासन कार्यालय उदयपुरको नेतृत्वमा भएको बजार अनुगमनकोक्रममा कटारी बजारमा रहेको दिलीप चौधरीको अशुतोष ट्रेडर्स तथा जनरल स्टोर र जयमाँकाली प्रालिको गोदाममा लुकाएर राखिएको दुईसय बोरा  सरकारी अनुदानको युरिया मल फेला परेको थियो । त्यसपछि कटारी बजारमा युरिया मलमा चरम कालोबजारी भइरहेको रहस्य खुलेको हाे ।

त्यही घटनालाई लिएर माओवादी केन्द्र कटारी नगर कमिटीका अध्यक्ष कमल श्रेष्ठ र सचिव ईश्वर पोखरेलले जारी गरेकाे  विज्ञप्तिमा भनिएको छ, ‘अनुदान मल वितरण व्यवस्था कार्यविधि २०८२ मा व्यवस्था भए अनुसार स्थानिय तह मल वितरण व्यवस्थापन समिति नगरपालिकाको मातहतमा रहँदा रहँदै अनधिकृत रूपमा विचौलियाको हातमा पुग्नुले नगरपालिकाप्रति नै गम्भिर शंका पैदा भएको छ ।’

अनुगमन टोलीले चौधरीको नीजि गोदामबाट लुकाइएको युरियाल मल बरामद हुनु कटारी बजार भित्र विचौलिया र कालोबजारीको जालो फैलिएको बताइएको छ । ‘यो एउटा जघन्य अपराध हो । आम किसानहरु मलको अभावले पिडामा रहेको बेला यस्तो घटना बाहिरिनु आम नगरबासि किसान हरुको निम्ती दुःखद् र पिडादायी छ ।’ विज्ञप्तिमा भनिएको छ, ‘त्यस कारण सम्बन्धित निकायले यो घट्‌नाको निष्पक्ष रुपमा सत्य तथ्य अनुसन्धान तथा छानविन गरी दोषीलाई कडा भन्दा कडा कारवाही गरी कालोबजारीको जालो तोडेर आम किसानलाई सहज रुपमा रसायनिक मल उपलब्ध गराउन जोडदार माग गर्दछौँ ।’

मुलुकभर मल अभावका कारण मर्कामा परेका किसानलाई अवैधानिक ढंगले मल लुकाएर कालोबजारी गर्ने प्रवृत्ति अत्यन्तै निन्दनीय रहेको माओवादी केन्द्र कटारीको दाबी छ । 

विज्ञप्तिमा भनिएको छ, ‘किसान मलको अभावमा दुःख भोगिरहेका बेला कालोबजारीयाले मल लुकाएर राख्नु आम नगरबासी किसानका लागि पीडादायी र दुःखद् छ।’ शुक्रबार कटारी नगरपालिकामा रहेका स्थानीय बुद्धिजीवि, अगुवा किसानले पनि विराेध प्रदर्शन गरेका थिए ।