नारायणी रंगशालाको खेलमैदान निर्माणमा खटिए खेलाडी, जीर्ण प्याराफिट निर्माण गर्न टेन्डर आह्वान

वीरगन्जको नारायणी रंगशालाको खेलमैदान सरसफाईदेखि मर्मत सम्भारमा यहाँका स्थानीय खेलाडीहरु खटिएका छन् । बजेट अभावका कारण जिर्ण बनेको रंगशाला निर्माण गर्न सरकार उदासिन भएको भन्दै अभ्यास गर्नका लागी खेलमैदान सरसफाईदेखि मर्मत गर्न लागेका हुन् । 

अहिले बिहानको समयमा स्थानीय खेलाडी खेलमैदानको सरसफाईदेखि मर्मत सम्भारमा जुटेको आरम्भ भेट्रान क्लबका सचिव सन्तोष खड्काले बताए । 
उनका अनुसार रंगशाला पुर्ण रुपमा जिर्ण भएकाले खेलकुद प्रतियोगीता पनि रोकिएको अवस्था छ। अब मैदानलाई सरसफाई गरेर भएपनि अभ्यास गर्न सकिने भएकाले यसमा खटिएको अवस्था छ ।

बिहानको समयमा खेलाडी र १३ नम्बर गणका शसस्त्र प्रहरी जवानहरु खेलमैदानमा सरसफाईदेखि मर्मतमा खटिने गरेको उनले बताए। अर्को खेलाडी राजकिशोर सिंहले पनि यहाँको खेलमैदान जिर्ण हुदाँ खेलाडीहरुलाई अभ्यास गर्ने कुनैपनि खेलमा सहभागी हुन समस्या भएकोमा चिन्ता व्यक्त गरे काठमाडौंको दशरथ रंगशालापछिको दोस्रो ठुलो रंगशाला पटक पटक मन्त्रीले अनुगमन र निरीक्षणका क्रममा स्तरोन्नति गर्न बजेट विनियोजना गर्ने आश्वासन दिएर वेवास्ता गरीएकोमा दु:ख व्यक्त गरे ।  

प्रतियोगिता नहुँदा खेलाडीहरू निराश 
०४३ सालमा स्थापना भएको नारायणी रंगशाला अहिले स्थानीय तह, प्रदेश र संघीय सरकारको उदासीनताका कारण जीर्ण अवस्थामा पुगेको हो । तत्कालीन अञ्चलाधीश लक्ष्यबहादुर गुरुङको पहलमा निर्माण गरिएको नेपालको दोस्रो नारायणी रंगशालाका पाराफिट संरक्षणको अभावमा जीर्ण बन्दा खेलाडीले गुनासो गरेका छन् । नारायणी रंगशाला र छेउमा रहेको क्रिकेट मैदान पनि ओझेलमा पर्दै गएको वीरगन्जका महेशप्रसाद यादवले गुनासो गरे । 

‘३५ वर्ष पुरानो फुटबल मैदान अहिले जीर्ण अवस्थामा पुगेको छ । सरकारले समयमा उचित मर्मत–सम्भार नगर्दा समस्या भएको हो,’ उनले भने । १८ बिघा क्षेत्रमा फैलिएको क्रिकेट र फुटबल मैदान जीर्ण बन्दै जाँदा वीरगन्जमा खेलकुद गतिविधिमा कमी आउनु र खेलप्रेमी निराश बन्नुको साथै राष्ट्रिय खेलाडी उत्पादनमा पनि समस्या बन्दै गएको फुटबल खेलाडी सुनिल राउतले बताए । उनका अनुसार रंगशालालाई पुनर्निर्माणका लागि डिपिआर पनि तयार गरिएको छ, तर त्यो डिपिआरअनुसार काम भने हुन सकेको छैन ।

प्याराफिट निर्माणकाे टेण्डर भइसक्यो
सरकारले चालू आर्थिक वर्ष ०८२/८३ मा नारायणी रंगशालालाई स्तोरोन्नती गर्नका लागी चार करोड बजेट विनियोजन भएपछि टेण्डर भईसकेको राष्ट्रिय खेलकुद परिषदका ईन्जिनियर शिवचन्द्र यादवले जानकारी दिए । उनका अनुसार चालु आबमा नारायणी रंगशादलामा बजेट परेकाले चार करोडको प्यारफिट निर्माण गर्न भदौ १० मा टेण्डर भईसकेको अवस्था छ । 

जिल्लाका अन्य खैलमैदानको पनि निर्माणदेखि स्तोरोन्न्तीको टेण्डर गर्ने प्रक्रिया अगाडि बढिरहेको इन्जिनियर यादवले बताए ।यस्तै पर्साका विभिन्न ठुला रंगशाला र खेलमैदानका लागि बजेट छुट्याएको छ । जिल्लाका विभिन्न खेलमैदानका लागि १७ करोड बजेट छुट्याएको बजेट पुस्तिकामा उल्लेख छ ।वीरगन्ज महानगरपालिकाअन्तर्गतको नारायणी रंगशाला, निर्माणाधीन नारायणी बहुउद्देश्यीय कभर्ड हल, आदर्शनगर रंगशाला र बढनियार मैदानका लागि बजेट विनियोजन भएको छ । 

नारायणी रंगशाला स्तरोन्नतिका लागि चार करोड, नारायणी बहुउद्देश्यीय कभर्ड हललाई चार करोड छुटयाईएको छ । यस्तै आदर्शनगर रंगशाला र बढनियार खेलकुद ग्राउन्ड निर्माण गर्न तीन करोड छुट्याइएको छ । जगरनाथपुर गाउँपालिकाको मधुवाहा मेघराज उपाध्याय क्रिकेट मैदान पनि समेटिएको छ । उक्त मैदानका लागि तीन करोड बजेट परेको छ । सोही वडामा रहेको क्रिकेट खेलमैदानमा तीन करोड बजेट परेको बजेट पुस्तिकामा उल्लेख छ ।