प्रधानमन्त्री ओली चीन प्रस्थान

प्रधानमन्त्री केपी ओली चीन प्रस्थान गरेका छन् । चीनको सियान्जिन सहरमा आयोजना हुने सांघाई सहयोग संगठन (एससिओ)को शिखर सम्मेलनमा भाग लिन ओली त्यसतर्फ प्रस्थान गरेका हुन् ।

प्रधानमन्त्री ओलीले आफू चिनियाँ राष्ट्रपति सी जिनपिङको निमन्त्रणामा नेपाली प्रतिनिधिमण्डलको नेतृत्व गर्दै १४–१८ भदौसम्म चीनको पाँचदिने भ्रमणमा जान लागेको शुक्रबार सदनलाई जानकारी गराएका थिए ।

भ्रमण दलमा धर्मपत्नी राधिका शाक्य, कांग्रेस उपसभापति पूर्णबहादुर खड्का, शिक्षामन्त्री रघुजी पन्त, पर्यटनमन्त्री बद्री पाण्डे, प्रधानमन्त्रीका आर्थिक तथा विकास सल्लाहकार डा. युवराज खतिवडा, एमाले सचिव छविलाल विश्वकर्मा, परराष्ट्र मन्त्रालयका सचिव र अन्य उच्चपदस्थ कर्मचारीहरू सहभागी छन् । प्रधानमन्त्रीलाई बिदाइ गर्न उपप्रधानमन्त्री तथा शहरी विकास मन्त्री प्रकाशमान सिंह, गृहमन्त्री रमेश लेखक, परराष्ट्रमन्त्री आरजु राणा देउवा विमानस्थल पुगेका थिए।

भ्रमणका क्रममा प्रधानमन्त्री ओलीले चिनियाँ राष्ट्रपति सीसँग दुईपक्षीय भेट गर्नेछन्  । उपराष्ट्रपति हान चङसँग पनि भेट हुने छ । १६ भदौमा सियान्जिनमा हुने एससिओ प्लस शिखर सम्मेलनमा सहभागिता जनाउँदै प्रधानमन्त्री ओलीले सम्बोधन गर्नेछन्

एससिओ शिखर सम्मेलनका क्रममा रुसी राष्ट्रपति भ्लादिमिर पुटिन, माल्दिभ्सका राष्ट्रपति डा. मोहमद मिज्जु, कम्बोडियाका प्रधानमन्त्री डा. सोमदेक मोहा बोरभोर तिपाहदे हुन महानेट, लाओसका प्रधानमन्त्री सोनेसाइ सिपानडोन, भियतनामका प्रधानमन्त्री फाम मिन चिङसँग छुट्टाछुट्टै भेटवार्ता तय भएको छ । मित्रराष्ट्रका प्रमुखसँगको द्विपक्षीय भेटवार्तामा नेपाल र ती मुलुकबिचका द्विपक्षीय एवं अन्य प्राथमिकताका विषयमा छलफल हुने छ ।

जापानविरुद्ध चिनियाँ विजयोत्सवमा सहभागी हुने
प्रधानमन्त्री ओलीले जापानविरुद्ध चिनियाँ विजयोत्सवमा सहभागी हुने जानकारी पनि सदनलाई गराएका छन् । यो उत्सवमा सहभागी हुँदा नेपालको असंलग्न परराष्ट्र नीतिविपरीत हुने भनेर प्रश्न उठिरहेका वेला ओलीले सदनमा भने, ‘विश्वका नेताहरूसँगै हाम्रो प्रतिनिधिमण्डल पनि चीन सरकारद्वारा बेइजिङमा आयोजना हुने फासीवादविरुद्धको विश्वयुद्ध र जापानी अतिक्रमणविरुद्धको चिनियाँ जनताको प्रतिरोधी युद्धमाथिको विजयको ८०औँ वार्षिकोत्सव समारोहमा सहभागी हुनेछ ।’ 

भ्रमणबाट नेपाल र चीनबिचको मैत्रीपूर्ण द्विपक्षीय सम्बन्ध थप सुदृढ हुने, एससिओ शिखर सम्मेलनमा सहभागिताले अन्तर्राष्ट्रिय मञ्चमा विभिन्न समसामयिक विषयमा नेपालको अवधारणा एवं प्राथमिकताको प्रस्तुतिबाट मुलुकको छवि एवं प्रतिष्ठा अभिवृद्धि हुने भनाइ ओलीको छ । ‘नेपालको हित र प्रतिष्ठालाई माथि उठाउने गरी मेरो नेतृत्वमा गएको प्रतिनिधिमण्डलले काम गर्नेछ । यसमा विश्वस्त रहन सदनलाई आग्रह गर्दछु,’ उनले भने ।

तस्बिर : संजित परियार/नयाँ पत्रिका