राखेपको ६३औँ वार्षिकोत्सव : विश्वकप रजत विजेता खोखो उत्कृष्ट टिम

राष्ट्रिय खेलकुद परिषद् (राखेप)ले आफ्नो ६२औँ वार्षिकोत्सवका अवसरमा राष्ट्रिय पुरुष र महिला खोखो टोलीलाई उत्कृष्ट अवार्डसहित शुक्रबार पुरस्कृत गरेको छ । खो खोको सिनियर र महिला टोलीले उत्कृष्ट हुँदै समान एक लाख पाएका छन् । दुवै टोलीले भारतमा भएको प्रथम खोखो विश्वकपको उपविजेताको उपाधि हात पारेका थिए । यसैगरी, नेपाल र भारतबिच भएको टेस्ट म्याचमा जितेको थियो ।

खोखोसँगै जुनियरमा दुई र पारामा एक खेलाडी, १० कर्मचारी, एक राष्ट्रिय खेल संघ, एक प्रायोजक, दुई पत्रकार र एक स्थानीयलाई सम्मान गरिएको छ । उत्कृष्ट खेलकुद पत्रकारको पुरुषमा खेलाडी डटकमका अञ्जन खड्का र महिलामा मेरो खेल डटकमकी लक्ष्मी शाक्य जनही २० हजारसहित सम्मानित भए । जुनियरको पुरुषमा बक्सिङका अर्पिल राना तथा महिलामा क्रिकेटकी पूजा महतोले जनही ५० हजार रुपैयाँ पाए ।

अर्पिलले थाइल्यान्डमा भएको एसियाली यू–२२ युथ बक्सिङ तथा श्रीलंकामा भएको एसियाली बक्सिङ यू–१९ मा कांस्य जितेका थिए । पूजाले विश्वकप एसियाली छनोटमा दुई सय ७२ रन बनाउनुका साथै १० विकेट लिएकी थिइन् । सोही छनोटमा उनी ‘प्लेयर अफ द सिरिज’ भएकी थिइन् । पारातर्फ तेक्वान्दोकी पलेशा गोवर्धन ५० हजार नगदसहित सम्मानित भइन् । पलेशाले पेरिस पाराओलम्पिकमा ऐतिहासिक कांस्य पदक तथा मलेसियामा भएको १०औँ एसियाली पारातेक्वान्दोमा कांस्य पदक जितेकी थिइन् ।

उत्कृष्ट राष्ट्रिय खेल संघमा नेपाल क्रिकेट संघ (क्यान) एक लाख नगदसहित पुरस्कृत भयो । कर्मचारीतर्फ सर्वोत्कृष्ट परिषद् सेवा पुरस्कारबाट परिषद्को सचिवालयका नायब वरिष्ठ प्रशासकीय अधिकृत फणीन्द्रप्रसाद पौडेल (प्रशासन) भए । राखेपका अध्यक्ष युवा तथा खेलकुदमन्त्री तेजुलाल चौधरीलगायतले पुरस्कृत गरे ।