रोमन लिपिको इम्बोस्ड नम्बर प्लेट खारेज नगरे आमरण अनसन बस्छु : डा. दीपेश केसी

जाग नेपालीका संयोजक डा. दीपेश केसीले देवनागरी लिपि मेट्नेगरी ल्याइएको इम्बोस्ड नम्बर प्लेट खारेज नगरे आमरण अनसन बस्ने बताएका छन्। उनले कमिशनको लोभमा देशको लिपि मेट्ने दीर्घकालिन योजनाअन्तर्गत इम्बोस्ड नम्बर प्लेट ल्याएको भन्दै आमरण अनसन बस्ने बताएका हुन्। नेपालको लिपि जोगाउन प्राणको आहुती दिन तयार भएको बताए।

शुक्रबार रिपोर्टस क्लब नेपालमा पत्रकार सम्मेलन गरी डा. केसीले भने, ‘नेपालको देवनागरी लिपि मेट्ने इम्बोस्ड नम्बर प्लेट खारेज गरेरै छाड्छौं, आमरण अनसन बसेर देशव्यापी दबाबको माहोल तयार गर्नेछौं।’

केसीले रोमन लिपिको इम्बोस्ड नम्बर प्लेटको विरोधमा पत्रकार, पेशाकर्मी, कला, साहित्य, संगित क्षेत्रका व्यक्तित्वहरुले एकसाथ आवाज उठाएको भन्दै सिंगो देश जागिसकेको बताए। उनले संसदमा यस्तो गम्भीर विषयमा आवाज नउठ्नुले अहिलेका सांसदहरु नेपाल र नेपालीका वास्तविक प्रतिनिधि नभएको प्रमाणित भएको बताए।

नेपालको सीमा रक्षा देखि अन्य सुरक्षाको जिम्मेवारी पाएको नेपाली सेनाले राष्ट्रको लिपिमाथि आक्रमण हुँदा किन टुलुटुलु हेरिरहेको छ भनी प्रश्न समेत गरे। देशको अस्तित्व नै समाप्त पार्ने गतिविधिप्रति आम नागरिक जाग्नुपर्नेमा जोड दिए।

रोमन लिपिको इम्बोस्ड नम्बर प्लेट बुझ्न नै कठिन भएको बताए। यो प्लेट भारतीय जस्तो रहेको र ट्राफिकले पनि चिन्न नसक्ने बताए। नेपाल स्वतन्त्र नागरिक सञ्जालका संयोजक दिनेश सुवेदीले इम्बोस्ड नम्बर प्लेट लाद्न सरकारले भ्रम फैलाउने देखि षड्यन्त्रका तानाबुनासमेत बुनेको बताए। उनले देशव्यापी विरोध हुँदा पनि सरकारले उल्टै धम्कीयुक्त भाषा प्रयोग गरेकोमा आपत्ति जनाए।

सुवेदीले सरकारका भौतिक पूर्वाधार तथा यातायातमन्त्रीले रोमन लिपिको वकालत गर्दै हिंडेर देशघाती कार्य गरेको बताए। उनले कुनै हालतमा देवनागरी लिपिमा हुनुपर्ने, भ्रष्टाचारीलाई कारबाही हुनुपर्ने र सुरक्षाको ग्यारेन्टी हुनुपर्ने बताए।

राष्ट्रवादी जागरण अभियानका विक्रम थापाले इम्बोस्ड नम्बर प्लेट बहिष्कार गर्न आम जनतालाई आव्हान गरे। उनले नेपाललाई उपनिवेश बनाउन खोजेको हो भनी प्रश्न समेत गरे।