निर्वाचन प्रणालीले नभई कार्यशैलीले अस्थिरता निम्त्याएको सरकारका प्रवक्ताको भनाइ

सञ्चार तथा सूचना प्रविधिमन्त्री पृथ्वीसुब्बा गुरुङले निर्वाचन प्रणालीले नभई राजनीतिक दल र तिनका नेताहरूको कार्यशैलीले अस्थिरता निम्त्याएको बताएका छन्।

आदिवासी जनजाति उत्थान राष्ट्रिय प्रतिष्ठानद्वारा राजधानीमा शुक्रबार आयोजित पुस्तक लोकार्पण समारोहमा उनले सो कुरा बताएका हुन्। राजनीतिक दलका नेताहरूको सत्ताकेन्द्रित आचरणले गर्दा अस्थिरता उत्पन्न भएको बताउँदै मन्त्री गुरुङले त्यसको दोष निर्वाचन प्रणालीलाई दिनु उपयुक्त नहुने बताए।

राज्य सञ्चालनमा सबैको सहभागिताका लागि समानुपातिक निर्वाचण प्रणाली अवलम्बन गरेको पनि मन्त्री गुरुङको भनाइ थियो। उनले समानुपातिक समावेशी निर्वाचन प्रणाली हटाइयो भने संविधानको मूल मर्म नै मर्ने हुँदा यसको पक्षमा जनमत सिर्जना गर्नु आवश्यक रहेको धारणा राखे।

पछिल्लो समय समावेशी र समानुपातिक प्रणालीलाई नेताले नै कमजोर बनाउन लागेको बताउँदै त्यसको बचाउ गर्न सबै समुदाय एकजुट हुन जरुरी रहेको उनको भनाइ छ। ‘कतिपय नेताकै बुझाइ के छ भने स्थायी सरकार नहुनुमा समावेशी प्रणाली बाधक हो भन्ने छ,’ उनले भने, ‘जुन तर्कसंगत छैन।’

कार्यक्रममा प्रा.डा. कृष्ण हाछेथूले प्रतिष्ठान आदिवासीको ज्ञान उत्पादन गर्ने संस्था भएकाले यसको आवश्यकता रहेको बताए। आदिवासीको ज्ञानसँगै आदिवासीको इतिहासको खोजी र लेखनको कामसमेत प्रतिष्ठानले गर्नुपर्ने उनले सुझाव दिए।