लहानबाट सात लाख रुपैयाँभन्दा बढी मूल्यको भन्सार छलीका कपडा बरामद

सशस्त्र प्रहरी बलको टोलीले सिराहाको लहान ठाढी सडकअन्तर्गत लहान नगरपालिका– १९ छर्रापट्टि चोकनजिकबाट भन्सार छली गरी ल्याउँदै गरेको सात लाखभन्दा बढी मूल्यको कपडासहित भारतीय नम्बर प्लेटको स्कार्पियो नियन्त्रणमा लिएको छ । 

भन्सार छली भित्र्याइएको सात लाख चार हजार ८५० रुपैयाँ मूल्यको विभिन्न खालका कपडा र १५ लाख रुपैयाँकाे स्कर्पियो आवश्यक कारबाहीका लागि शुक्रबार बिहान ठाढी भन्सार कार्यालयमा बुझाइएको सशस्त्र प्रहरी बल नेपाल नं. ७ गण हेडक्वार्टर सिराहाका प्रमुख सशस्त्र प्रहरी उपरीक्षक नरेश भण्डारीले जानकारी दिए ।

उनका अनुसार बिहीबार राति ८ बजेतिर नियमित चेकजाँचमा रहेको लहानस्थित सशस्त्र प्रहरी बलको सुरक्षा बेस क्याम्पबाट सशस्त्र प्रहरी नायब उपरीक्षक विजयकुमार चौधरीको कमान्डमा खटिएको मोबाइल गस्ती टोलीले भन्सार छली गरेको कपडा बोकेको भारतीय नम्बर प्लेटको स्कर्पियो नियन्त्रणमा लिएको हो । 

सशस्त्र प्रहरीले छर्रापट्टि चोकनजिकै चेकजाँचको क्रममा रोक्न खोज्दा तीव्र गतिमा भागेको बिआर ०१ पिबी ४६४२ नम्बर रहेको सेतो रङकाे भारतीय स्कर्पियोलाई पछ्याउँदै जाने क्रममा  लहान १९ कटाहा चोकनजिकको बाटोको छेउमा वेबारिसे अवस्थामा भेटिएको उनले बताए । चालक फरार भएको अवस्थामा बरामद भएको स्कर्पियो चेकजाँच गर्दा भन्सार छली गरेर ल्याइएको कपडा पाइएको हो ।