१८ भदौदेखि अनिश्चितकालीन विद्यालय बन्दको घोषणा

निजी विद्यालयहरूले १८ भदौदेखि विद्यालय बन्दको घोषणा गरेका छन् । बिहीबार दोस्रो चरणका विरोधका कार्यक्रम घोषणा गर्दै निजी विद्यालयका सञ्चालकहरूले विद्यालय ठप्प पार्ने जनाएका हुन् ।

आन्दोलनको नेतृत्व निजी विद्यालयका छाता संगठन प्याब्सन, एन प्याब्सन, हिसाललगायतले गरिरहेका छन् । दोस्रो चरणको आन्दोलनअन्तर्गत निजी विद्यालयहरूले १२ भदौमा देशभरका जिल्ला सदरमुकाममा बृहत् खबरदारी सभा गरेका छन् । त्यस्तै, शुक्रबार माइतीघर मण्डलामा प्रदर्शन गर्ने घोषणा गरेका छन् । १४ र १५ भदौमा आन्दोलनको तयारी बैठक बस्ने, १६ भदौमा देशैभरका स्कुल बसहरूमा कालोझन्डा/ब्यानरसहित नगर परिक्रमा गराउने, १७ भदौमा आन्दोलनका लागि तयारी बैठक बस्ने, १८ भदौदेखि अनिश्चितकालका विद्यालय बन्द गर्ने कार्यक्रम तय गरिएको प्याब्सनका केन्द्रीय अध्यक्ष कृष्णप्रसाद अधिकारीले जानकारी दिए ।

विद्यालय शिक्षा विधेयकमा निजी विद्यालयलाई गैरनाफामूलक भन्न नहुने, कम्पनीबाट हटाउन नपाइने, पूर्ण छात्रवृत्ति खारेज गर्नुपर्ने लगायत माग राख्दै निजी विद्यालयहरूले आन्दोलन गर्दै आइरहेका छन् । ५ भदौयता निरन्तर प्रदर्शन गर्दै आइरहेका निजी विद्यालयहरूको माग सुनुवाइ नभएपछि विद्यालय नै बन्द गरेर आन्दोलन गर्ने घोषणा गरेका हुन् । संसद्को शिक्षा, स्वास्थ्य तथा सूचना प्रविधि समितिले ५ भदौमा विद्यालय शिक्षा विधेयक प्रतिनिधिसभामा पेस गरेको थियो । तर, उक्त विधेयकमा निजी विद्यालयलाई कडाइ गर्ने गरी व्यवस्था गरेको भन्दै उनीहरू आन्दोलित बन्दै आएका छन् । विशेषगरी पूर्ण छात्रवृत्ति, गैरनाफामूलकजस्ता प्रावधानमा निजी विद्यालयहरूले आपत्ति जनाएका छन् ।

यसअघि ४ भदौमा पत्रकार सम्मेलन गर्दै निजी विद्यालय सञ्चालकहरूले पहिलो चरणको आन्दोलनका कार्यक्रम घोषणा गरेका थिए । तर, पहिलो चरणको आन्दोलनबाट सरकारले सुनुवाइ नगरेको भन्दै अब विद्यालय नै बन्द गरेर आन्दोलन चर्काउने घोषणा गरेका हुन् । विधेयकमा ‘पूर्ण छात्रवृत्ति’ भन्ने शब्द हटाइनुपर्ने, विद्यालयहरूमा उत्पादन नहुने सामग्रीहरू जस्तै पोसाक, स्टेसनरी, शैक्षिक सामग्री, खाना–खाजा उपलब्ध गराउने प्रावधान खारेज गर्नुपर्ने, कम्पनी ऐनअनुसार दर्ता भई सञ्चालनमा रहेका विद्यालयलाई गैरनाफामूलक बनाउँदै लगिने भन्ने प्रावधान हटाइनुपर्ने, छात्रवृत्ति वितरणको अधिकार सम्बन्धित विद्यालयमा रहनुपर्ने, पालिका प्रतिनिधिको सहभागितामा एक पारदर्शी समिति गठन गरी वितरण गर्न सकिने व्यवस्था गरिनुपर्नेलगायत माग राखेका छन् ।

शिक्षक महासंघद्वारा एमाले पार्टी कार्यालयमा धर्ना
नेपाल शिक्षक महासंघले बिहीबार एमाले पार्टी कार्यालय च्यासलमा धर्ना दिएको छ । विद्यालय शिक्षा विधेयकमा शिक्षकका माग सम्बोधन नभएको भन्दै महासंघले दबाब दिन पार्टी कार्यालयहरूमा धर्ना दिएको हो ।

बिहान ११ बजेदेखि १ बजेसम्म धर्ना दिएको महासंघको टिमले एमाले महासचिव शंकर पोखरेललाई ध्यानाकर्षणपत्रसमेत बुझाएको छ । ‘हामी अहिले हरेक पार्टी कार्यालयहरूमा धर्ना दिने र ध्यानाकर्षणपत्र बुझाउने अभियानमा छौँ, हाम्रो माग सम्बोधन नभईकन विधेयक प्रतिनिधिसभामा पेस भयो, तर हाम्रा माग जसरी पनि पूरा हुनैपर्छ भन्ने हाम्रो अडान हो,’ महासंघका अध्यक्ष लक्ष्मीकिशोर सुवेदीले भने ।

यसअघि महासंघले बुधबार कांग्रेसको पार्टी कार्यालय सानेपामा धर्ना दिएको थियो । शुक्रबार माओवादीको कार्यालयमा धर्ना दिने सुवेदीले बताए । त्यस्तै, अन्य साना दलका कार्यालयहरूमा पनि धर्ना दिइनेछ । दबाबका पहिलो चरणका कार्यक्रमबाट सरकारले सुनुवाइ नगरे दोस्रो चरणमा महासंघले विद्यालय नै बन्द गरेर आन्दोलन गर्ने चेतावनी दिएको छ । संसद्को शिक्षा, स्वास्थ्य तथा सूचना प्रविधि समितिले ५ भदौमा प्रतिनिधिसभामा विद्यालय शिक्षा विधेयक पेस गरेको थियो ।