- वि.सं २o८२ भदौ १ आइतबार
गत आर्थिक वर्ष ०८१/८२ मा नेपाल विद्युत् प्राधिकरणले नौ अर्ब ६ करोड ७० लाख रुपैयाँ नाफा कमाएको छ । यो करअघिको नाफा हो ।
आज काठमाडौंमा जारी प्राधिकरणको ४०औँ वार्षिकाेत्सव समारोहमा कार्यकारी निर्देशक हितेन्द्रदेव शाक्यले गत आवमा सोबराबरको नाफा भएको बताएका हुन् । यद्यपि, यो अघिल्लो आव ०८०/८१ को तुलनामा ३७.३२ प्रतिशत कम हो । उक्त आवमा प्राधिकरणको यस्तो नाफा १४ अर्ब ४६ करोड ५० लाख रुपैयाँ थियो ।
गत आवमा प्राधिकरणको कुल आम्दानी एक खर्ब ३८ अर्ब ८७ करोड रुपैयाँ रहेको छ । खर्च भने एक खर्ब १९ अर्ब ८१ करोड रुपैयाँ भएको शाक्यले बताए । विद्युत् खरिद, सञ्चालन, ब्याज भुक्तानीलगायतका शीर्षकमा सोबराबरको खर्च भएको हो ।
