- वि.सं Invalid date format
शुक्लाफाँटा नगरपालिकामा २० वर्षमुनिका किशोरी आमा बन्ने दर बढ्दै जान थालेको छ। उमेर नपुगेरै विवाह गरी आमा बन्ने किशोरीमा शारीरिक तथा मानसिक स्वास्थ्यमा असर पर्दै गएको छ।
नगरपालिकाको स्वास्थ्य शाखाको तथ्यांकअनुसार चालू आवमा बर्थिङ सेटरमा सुत्केरी भएका ३०२ महिलामध्ये २० वर्षमुनिका ३० जना रहेका छन्। गत वर्ष त्यो संख्या २८ रहेको थियो। उमेर नपुगीकनै आमा बन्ने किशोरीको उमेर १६ देखि १९ वर्ष रहने गरेको छ।
२० वर्षमुनिका किशोरीमा गर्भधारणका लागि शरीर परिपक्व नहुँदा बच्चा र आमा दुवैको स्वास्थ्य अवस्था जोखिममा पर्ने नगरपालिकाको स्वास्थ्य शाखाका प्रमुख परमानन्द भट्टले बताए। उनका अनुसार कानुनी रूपमा २० वर्षभन्दा कम उमेरमा विवाह गर्न नपाइने प्रावधान भए पनि व्यवहारमा भने त्यो लागू हुन सकेको छैन। शिक्षा, जनचेतना र यौन स्वास्थ्यसम्बन्धी जानकारीको अभावले किशोरी सुरक्षित यौन व्यवहारबारे जानकारी नपाई गर्भवती हुने गरेको उनी बताउँछन्।
शरीरको पूर्ण विकास नहुँदा प्रसूतिमा जटिलता, कम तौलको बच्चा जन्मिनु, संक्रमणको जोखिम आमामा रहन्छ भने जन्मने शिशुमा शारीरिक कमजोरी र संक्रमण दर बढ्दो रूपमा रहेको पाइने गरेको उनले बताए।
‘शिक्षा, जनचेतना र स्वास्थ्य सेवा सुदृढ पार्न सके मात्रै किशोरी गर्भाधारण दर घटाउन सकिन्छ,’ उनले भने, ‘समुदायस्तरमा महिला शिक्षाको पहुँचलाई अभिवृद्धि गर्दै किशोरीलाई यौन शिक्षा दिने कार्यसँगै बालविवाहविरुद्धको कानुनी प्रावधानबारे जानकारी गराइनुपर्छ।’
अधिकांश २० वर्षमुनिका गर्भवती हुने किशोरीमा विद्यालयको पढाइ बिचमै छाडेर भागी विवाह गरेको पाइएको छ। अभिभावकको दबाबमा किशोरावस्थामै विवाह गरिएको भने पाइएको छैन।
