शेखर कोइरालाले मागे गृहमन्त्री लेखकको राजीनामा 

भिजिट भिसाको संगठित धन्दा चलाएको आरोप खेपिरहेका गृहमन्त्री रमेश लेखकलाई राजीनामा दिन कांग्रेसभित्रैबाट दबाब बढेको छ। कांग्रेस नेता डा.शेखर कोइरालाले समेत उनलाई राजीनामा दिएर अनुसन्धानमा सघाउन आग्रह गरेका छन्। 

शनिबार विराटनगरमा पत्रकारहरूसँग बोल्दै उनले नैतिकताका हिसाबले राजीनामा गर्नुपर्ने बताएका हुन्। उनले भने, ‘उहाँले नैतिकताको हिसाबमा म क्लिन छु, मैले राजीनामा गरेँ, छानबिन समिति बनाउनुस्, भने भइहाल्यो, सक्यो, त्यसले मोरल स्ट्याटस देखाउँछ।’ 

विमानस्थलबाट हुने भिजिट भिसाको मानव तस्करी मन्त्रालयकै मिलेमतोमा चलेको अख्तियार दुरुपयोग अनुसन्धान आयोगको छानबिनले देखाएको छ। गिरोहमा उनको सचिवालयका कर्मचारीको प्रत्यक्ष संलग्नता देखिएको स्रोत बताउँछ। पछिल्लो समय अध्यागमनमा दैनिक ५० लाखसम्म लेनदेन हुने गरेको सूचनाका आधारमा अख्तियारले मंगलबार छापा हानेको थियो। आयोगले सहसचिव तीर्थराज भट्टराई र उनका सहयोगीहरूको मोबाइल जफत गरेर अनुसन्धान गरिरहेको छ। प्रारम्भिक अनुसन्धानमै गृह मन्त्रालयको मिलेमतो देखिएको स्रोत बताउँछ। संस्थागत र संगठित रूपमा भिजिट भिसामा असुली धन्दा चलेको थियो। 

यस प्रकरणमा अन्य दलका नेताहरूले पनि मन्त्री लेखकलाई बर्खास्त गर्न माग गरेका छन्। 

यता मन्त्रीकै पद धरापमा परेपछि गृह मन्त्रालयले आज सो विषयमा प्रेस विज्ञप्ति निकाल्ने तयारी गरेको छ। 

पदमै बस्दा उनले अनुसन्धान प्रभावित पार्न सक्ने भन्दै हटाउन माग गर्दै सर्वाेच्च अदालतमा समेत रिट निवेदन पेस भएको छ भने प्रधानमन्त्री कार्यालयमा उजुरी परेको छ।