आइसिसी टी–२० विश्वकप एसिया छनोटमा नेपाल उपविजेता

नेपाली राष्ट्रिय महिला टोली आइसिसी महिला टी–२० विश्वकप एसिया छनोट प्रतियोगिताको उपविजेता बनेको छ । छनोटअन्तर्गत सुपर थ्रीको मंगलबार भएको अन्तिम खेलमा थाइल्यान्डले नेपाललाई ७८ रनले पराजित गरेको हो । जितसँगै आयोजक थाइल्यान्ड एसियन छनोटको विजेता बनेको छ । नेपाल र थाइल्यान्डले उपाधिका लागि प्रतिस्पर्धा गरेका थिए । मैदानमा प्रवेश गर्नुअघि नै नेपाल र थाइल्यान्डले सुपर थ्रीको शीर्ष दुईमा रहँदै टी–२० विश्वकपको ग्लोबल छनोटमा स्थान पक्का गरिसकेका थिए । 

नेपालले सोमबार युएईमाथि सानदार जित निकाली पहिलोपटक ग्लोबल छनोटमा स्थान सुरक्षित गरेको थियो । १८ वर्षको अन्तर्राष्ट्रिय यात्राको क्रममा नेपालले छैटौँ प्रयासमा एसियन छनोटबाट आइसिसी विश्वकप टी–२० को ग्लोबल छनोट स्थान सुरक्षित गरेको हो । सन् २०१६ को संस्करणदेखि नेपालले निरन्तर रूपमा टी–२० महिला विश्वकप छनोट खेलमा सहभागिता जनाइरहेको छ । 

यसअघिका टी–२० विश्वकप छनोटमा नेपाल समूह चरणबाटै बाहिरिँदै आएको थियो । थाइल्यान्डमा विजेता हुने लक्ष्यका साथ सहभागी भएको नेपालले अन्तिम खेलमा ब्याटिङमा कमजोर प्रदर्शन गरेको थियो । थाइल्यान्डले पहिलो ब्याटिङ गरी २० ओभरमा दुई विकेट गुमाएर एक सय ५८ रनको योगफल बनायो । प्रत्युत्तरमा नेपालले २० ओभरमा नौ विकेटको क्षतिमा ८० रन जोड्दा ७८ रनको फराकिलो अन्तरले हारको सामना गर्‍यो । 

एसियन छनोटमा नेपालले समूह ‘सी’को विजेता हुँदै पहिलोपटक सुपर थ्रीमा स्थान बनाएको थियो । यसक्रममा नेपालले समूह चरणमा बहराइनमाथि दुईपटक जित निकालेको थियो । हङकङसँगको खेलमा नेपाल ६ विकेटले पराजित भएको थियो । समूहको अन्तिम खेलमा बहराइन र हङकङबिचको खेल वर्षाले रद्द हुँदा नेपाल भाग्यमानी ठहरियो । लिग चरणमा सर्वाधिक जित निकाल्ने टोलीका रूपमा नेपालले सुपर थ्री स्थान पक्का गरेको थियो । 

नेपालका पाँच खेलाडीको शून्य रन
एसियन छनोटको विजेता बन्न नेपालले एक सय ५९ रन पछ्याउनुपर्ने थियो । तर, नेपालका ब्याट्सम्यानले अनुभवी थाइल्यान्डको बलिङ सामना गर्न सकेन । थाइल्यान्डकी ओनिचाले ह्याट्रिकसहित चार विकेट लिएपछि नेपालको ब्याटिङ कमजोर देखियो । ओनिचाले इनिङ्सको १८औँ ओभरमा ह्याट्रिक गरेकी हुन् । उनले १८.३ ओभरमा रोमा थापा, १८.४ ओभरमा ईश्वरी विष्ट र १८.५ ओभरमा रिया शर्माको विकेट लिँदै प्रतियोगितामै पहिलो ह्याट्रिक पूरा गरिन् । नेपालले एकै ओभरमा लगातार तीन विकेट गुमाउनुअघि ७५–६ को स्थिति बनाएको थियो । 

ओनिचको ह्याट्रिक ओभरपछि नेपाल ७५–८ मै रह्यो । रोमा, ईश्वरी र रिया डकआउट भए । ईश्वरी र रिया गोल्डेन डकआउट भए । ओनिचले चार ओभरमा एक मेडन राखी ११ रन खर्चेर सर्वाधिक चार विकेट लिएकी थिइन् । यसैगरी, थिपाचले चार ओभरमा एक मेडन राखी १४ रन खर्चेर तीन विकेट लिँदा नेपाल लक्ष्यसम्म पुग्न सकेन । समग्रमा नेपालको ब्याटिङ इनिङ्समा पाँच खेलाडीले रनै बनाउन सकेनन् । उपकप्तान पूजा महतो पनि शून्य रनमा पेभेलियन फर्केकी थिइन् । 

कविताको सर्वाधिक २४ रन
नेपालले लक्ष्य पछ्याउँदा सुरुवातदेखि कमजोर ब्याटिङ प्रदर्शन गरेको थियो । तेस्रो क्रममा ब्याटिङ गरेकी कविता कुँवरले सर्वाधिक २४ रनको योगदान दिइन् । उनले ३३ बलमा एक चौका प्रहार गरेकी थिइन् । यसैगरी, रजमती ऐरीले २७ बल खेलेर दुई चौकाको सहयोगमा २० रन जोडिन् । पूर्वकप्तान रुबिना क्षेत्रीले १६ बलमा १२ रन जोडिन् । नेपाललाई ग्लोबल छनोटमा पुर्‍याउन महŒवपूर्ण भूमिका निर्वाह गरेकी कप्तान इन्दु बर्माले थाइल्यान्डविरुद्ध १५ बलमा सात रनको योगदान दिइन् । 

थाइल्यान्डको ब्याटिङमा दुई अर्धशतक
थाइल्यान्डको बलियो ब्याटिङमा दुई ब्याट्सम्यानाले अर्धशतक बनाए । ओपनर नतायाले अर्धशतक प्रहार गरिन् । उनले ५० रन जोड्न ४२ बल खेलेर ५ चौका प्रहार गरेकी थिइन् । यसैगरी, कोन्चारोनीले २८ बलमा ५० रन बनाइन् । नटआउट रहेकी उनले आठ चौका प्रहार गरेकी थिइन् । थाइल्यान्डले पहिलो विकेटका लागि १२.४ ओभरमा ७५ रन जोडेको थियो । ओपनर अफिसराले ४३ बलमा २९ रन बनाइन् । बलिङमा नेपालकी राजमती र मनीषा उपाध्यायले समान एक विकेट हात पारे । कविता, पूजा, ईश्वरी, राजमती र मनीषाले प्रतिओभर आठ रनरेटमा बलिङ गरेका थिए ।