- वि.सं २o८२ भदौ १३ शुक्रबार
जनता समाजवादी पार्टी (जसपा) नेपाल भूमि विधेयकको विरोधमा उत्रिएको छ । जसपा नेपाल जिल्ला समिति सप्तरीले भूमि विधेयकको विरोध गर्दै तोपामा झाडु जुलुस निकालेको हो।
पार्टी केन्द्रको निर्देशनअनुसार झाडु जुलुस निकालिएको जसपा नेपाल सप्तरीका सचिव नीरज मुक्तिले बताए। तिलाठी कोइलाडी– ८, तोपा चोकबाट सुरु भएको झाडु जुलुस बजार परिक्रमा गरेर विरोध सभामा परिणत भएको थियो।
जसपा नेपालले भूमिसम्बन्धी विधेयक मुलुक र जनताको हितमा नरहेको, भूमाफिया, जग्गा दलालको हित हुने र यसबाट वनजंगल विनाश भई तराई–मधेश मरुभूमीकरण हुने भन्दै प्रदर्शन गरेको हो।
पार्टीका केन्द्रीय सदस्य डा. बबिसिंह यादवले वर्तमान सरकारले वनजंगल विनाश गरेर मधेशलाई मरुभूमि बनाउन खाजेको आरोप लगाए।
भूमिसम्बन्धी विधेयक शुक्रबारको प्रतिनिधिसभा बैठकले बहुमतद्वारा पारित गरिसकेको छ।
