- वि.सं २o८२ भदौ १३ शुक्रबार
जाग नेपालीका संयोजक डा. दीपेश केसीले देवनागरी लिपि मेट्ने गरी ल्याइएको इम्बोस्ड नम्बर प्लेट खारेज नगरे आमरण अनशन बस्ने बताएका छन्। उनले कमिशनको लोभमा देशको लिपि मेट्ने दीर्घकालीन योजनाअन्तर्गत इम्बोस्ड नम्बर प्लेट ल्याएको भन्दै आमरण अनशन बस्ने बताएका हुन्। नेपालको लिपि जोगाउन प्राणको आहुती दिन तयार भएको उनले बताए।
शुक्रबार रिपोर्टर्स क्लब नेपालमा पत्रकार सम्मेलन गरी डा. केसीले भने, ‘नेपालको देवनागरी लिपि मेट्ने इम्बोस्ड नम्बर प्लेट खारेज गरेरै छाड्छौँ, आमरण अनशन बसेर देशव्यापी दबाबको माहोल तयार गर्नेछौँ।’
केसीले रोमन लिपिको इम्बोस्ड नम्बर प्लेटको विरोधमा पत्रकार, पेसाकर्मी, कला, साहित्य, संगीत क्षेत्रका व्यक्तित्वहरूले एकसाथ आवाज उठाएको भन्दै सिंगो देश जागिसकेको बताए। उनले संसदमा यस्तो गम्भीर विषयमा आवाज नउठ्नुले अहिलेका सांसदहरू नेपाल र नेपालीका वास्तविक प्रतिनिधि नभएको प्रमाणित भएको बताए।
नेपालको सीमा रक्षादेखि अन्य सुरक्षाको जिम्मेवारी पाएको नेपाली सेनाले राष्ट्रको लिपिमाथि आक्रमण हुँदा किन टुलुटुलु हेरिरहेको छ भनी प्रश्नसमेत गरे। देशको अस्तित्व नै समाप्त पार्ने गतिविधिप्रति आमनागरिक जाग्नुपर्नेमा जोड दिए।
उनले रोमन लिपिको इम्बोस्ड नम्बर प्लेट बुझ्न नै कठिन भएको बताए। यो प्लेट भारतीयजस्तो रहेको र ट्राफिकले पनि चिन्न नसक्ने बताए। नेपाल स्वतन्त्र नागरिक सञ्जालका संयोजक दिनेश सुवेदीले इम्बोस्ड नम्बर प्लेट लाद्न सरकारले भ्रम फैलाउनेदेखि षड्यन्त्रका तानाबुनासमेत बुनेको बताए। उनले देशव्यापी विरोध हुँदा पनि सरकारले उल्टै धम्कीयुक्त भाषा प्रयोग गरेकोमा आपत्ति जनाए।
सुवेदीले सरकारका भौतिक पूर्वाधार तथा यातायातमन्त्रीले रोमन लिपिको वकालत गर्दै हिँडेर देशघाती कार्य गरेको बताए। उनले कुनै हालतमा देवनागरी लिपिमा हुनुपर्ने, भ्रष्टाचारीलाई कारबाही हुनुपर्ने र सुरक्षाको ग्यारेन्टी हुनुपर्ने बताए।
राष्ट्रवादी जागरण अभियानका विक्रम थापाले इम्बोस्ड नम्बर प्लेट बहिष्कार गर्न आमजनतालाई आह्वान गरे। उनले नेपाललाई उपनिवेश बनाउन खोजेको हो भनी प्रश्नसमेत गरे।
