- वि.सं Invalid date format
ज्यान मार्ने उद्योग मुद्दामा पर्सा जिल्ला अदालतबाट धरौटीमा छुटेका एकजना कर्मचारी सहलेखा पालको रूपमा त्यही अदालतमै हाजिर भएका छन् । पर्साको पकाहाँ मैनपुर गाउँपालिका– २ का ३० वर्षीय अनिलकुमार कुशवाहा ज्यान मार्ने उद्योग मुद्दामा गत वैशाख ११ गते ७० हजार धरौटीमा रिहा भएर भदौ ११ मा सहलेखा पालको रूपमा हाजिर भएका छन् ।
कुशवाहाले कोष तथा लेखा नियन्त्रण कार्यालय रामेछापबाट सरुवा गराएर पर्सा जिल्ला अदालतको लेखा शाखामा हाजिर भएको जिल्ला अदालत पर्साले जनाएको छ। कुशवाह ज्यान मार्ने घटनामा संलग्न भएको अभियोगमा फरार रही अदालतमा हाजिर भएर धरौटीमा रिहा भएको धरौटीपत्रमा उल्लेख छ । ज्यान मार्ने उद्योग मुद्दामा उनीसहित नाैजनाविरुद्ध ०८२ वैशाख ९ मा स्थानीय हृदयनारायण महतोको जाहेरी अभियोगपत्र दर्ता भएको हो ।
ज्यान मार्ने उद्योगजस्तो गम्भीर मुद्दामा आरोप लागेका व्यक्ति धरौटीमा छुटेर पुनः त्यही अदालतमै हाजिर हुने विषयलाई गम्भीर रूपमा लिनुपर्ने कर्मचारीहरू बताउँछन् । न्यायिक निकायमै मुद्दा खेपिरहेका व्यक्तिलाई कार्यरत राख्नु भनेको अनुसन्धान र सुनुवाइको निष्पक्षता कमजोर पार्ने खतरा भएको कानुन व्यवसायीहरूको भनाइ छ ।
कानुनका जानकारहरूले धरौटीमा छुट्नु दोषमुक्त हुनु होइन, केवल थुनामुक्त हुनु मात्रै हो भन्दै यस किसिमका संवेदनशील मामिलामा अदालत आफैँ बढी सावधान हुनुपर्नेमा जोड दिएका छन् । पर्सा जिल्ला अदालतका श्रेस्तेदार प्रभाकर मल्लिकले ज्यान मार्ने उद्योग मुद्दाको आरोपमा अदालतबाट रिहाइ भएका कुशवाहाले मुद्दामा प्रभाव पार्ने नसक्ने बताए । कुशवाहा लेखा शाखामा कार्यरत भएकाले अदालतको न्यायिक निकायको मूल निर्णय प्रक्रियासँग प्रत्यक्ष सम्बन्ध राख्न नसक्ने भएकाले केही फरक नपर्ने उनले बताए ।
