स्वास्थ्य क्षेत्रको समस्या समाधानमा दायित्व नभुल्न कर्मचारीलाई स्वास्थ्य राज्यमन्त्रीको निर्देशन

स्वास्थ्य तथा जनसंख्या राज्यमन्त्री हिराचन्द्र केसीले स्वास्थ्य क्षेत्रको समस्या समाधानमा दायित्वलाई नबिर्सिन कर्मचारीलाई निर्देशन दिएका छन् । स्वास्थ्य सेवा विभागद्वारा मंगलबार आयोजित कार्यक्रममा स्वास्थ्य राज्यमन्त्री केसीले यस्तो बताएका हुन् । 

उनले सेवालाई पहिलो प्राथमिकतामा राखेर काम गर्न कर्मचारीलाई आग्रह गरे । उनले भने, ‘थप बजेट आवश्यक परे पहल गर्छौँ । विभागको स्तरोन्नतिका लागि के गर्नुपर्छ योजना बनाउनुस् । मन्त्रालयको सदैव सकारात्मक सहयोग रहन्छ । तर, आफ्नो स्वार्थभन्दा माथि उठेर काम गर्नुस् ।’

स्वास्थ्य सेवा विभाग स्वास्थ्य मन्त्रालयमातहतको महत्वपूर्ण निकाय भएकाले पनि यसको सबलीकरणका लागि योजना बनाउनुपर्ने बताए। ‘तपाईंहरूले जनतालाई पहिलो केन्द्रमा राखेर काम गर्नुपर्छ । अहिले पनि नागरिकहरू स्वास्थ्य सेवा सहज तरिकाले नपाएर भौँतारिनुपर्ने अवस्था छ । यो अवस्थाको हल गर्नुपर्ने आजको आवश्यकता हो,’ उनले भने।

कार्यक्रममा स्वास्थ्य सेवा विभागका महानिर्देशक डा. दीपेन्द्ररमण सिंहले विभागअन्तर्गतका मुख्य–मुख्य कार्यक्रमबारे जानकारी गराएका थिए ।