सप्तरीको अग्निसाइर कृष्णासवरण गाउँपालिका–२ स्थित ट्यांकरले दुई किलोमिटरकै दूरीमा दुईवटा मोटरसाइकललाई ठक्कर दिँदा दुईजनाको मृत्युु भएको छ । पूर्व–पश्चिम राजमार्गअन्तर्गत उक्त सडक खण्डमा पूर्वबाट पश्चिमतर्फ गइरहेको ना ७ ख ५४९५ नम्बरको ट्यांकरले स ११ प २५८५ र स २ प ५२४५ नम्बरको मोटरसाइकललाई ठक्कर दिएपछि दुर्घटना भएको हो । सीतापुरमा भएको दुर्घटनामा २५८५ नम्बरमा सवार रूपनी गाउँपालिका–३ कटैयाका विष्णुदेव परमाणीकी आठ वर्षीया छोरी यशोधाकुमारी परमाणीको मृत्यु भएको छ ।
सोही मोटरसाइकलमा सवार यशोधाकी ३२ वर्षीया आमा सुमनदेवी परमाणी र मामा कुसुमलाल मण्डल घाइते भएका छन् । दुर्घटनालगत्तै स्थानीयहरूले सडकमै शव राखेर राजमार्ग अवरुद्ध गरेका छन् । मृतक परिवारलाई क्षतिपूर्ति दिनुपर्ने र मनोमानी ढंगले ट्यांकर चलाउने चालकलाई कारबाही हुनुपर्ने माग गर्दै उनीहरूले सडक अवरुद्ध गरेका हुन् ।
यसैगरी, सीतापुरभन्दा करिब दुई किलोमिटरको दूरीमा रहेको चाँदनीचोकमा पनि सोही ट्र्याक्टरले ५२४५ नम्बरको मोटरसाइकल ठक्कर दिएको छ । मोटरसाइकलमा सवार कंचनरूप नगरपालिका–६ घोघनपुरका मो.अरणजैबकी ७ वर्षीया छोरी सुमैया प्रवीणको मृत्यु भएको छ । मोटरसाइकलमा सवार नविया प्रवीण घाइते भएका छन् ।
घाइतेहरूको उपचारका लागि ठेलियास्थित अस्पतालमा भर्ना गरिएको जिल्ला प्रहरी कार्यालय सप्तरीका एसपी राजेन्द्रप्रसाद धमलाले बताए ।
