बोक्सी भन्दै आफूमाथि कुटपिट गरेको भन्दै नेपालगन्ज उपमहानगरपालिका– २, घरबारी टोलकी ५७ वर्षीया आमना खातुनले जिल्ला प्रहरी कार्यालय बाँकेमा किटानी जोहरी दिएकी छिन् । उनले १६ भदाैमा किटानी जाहेरी दिएकी हुन् ।
बोक्सीको आरोप लगाउँदै कुटपिट गर्ने र गालीगलौज गर्नेलाई कारबाहीको माग गरी प्रहरीमा उजुरी दिएको उनले बताइन् । उनले आफूलाई देख्नासाथ बोक्सी भन्दै गालीगलौज गर्ने र कुटपिट गर्ने घरबारी टोलकै जमुना खातुन र मजुना खातुनविरुद्ध प्रहरीमा जाहेरी दिएको बताइन् । जमुना र मजुना दुवै आमनाका सहोदर भतिजी हुन् ।
उनले बोक्सीको आरोप लगाउँदै कुटपिट र गालीगलौज गर्ने दुवैजनालाई मुलुकी अपराध संहिताबमोजिम कारबाहीको माग गरी प्रहरीमा जाहेरी दिएको बताइन् । उनले कुटपिट र गालीगलौज गर्नेविरुद्ध मुलुकी अपराध संहिता, २०७४ को दफा १६८ को २ बमोजिम पाँच वर्ष कैद र ५० हजार जरिवाना माग गरेकी छिन् । आमना जमुना र मजुनाको माइतीको घरमा बस्दै आएकी छिन् ।
लकडाउन सुरु भएपछि आमनाको परिवार नेपालगन्ज उपमहानगरपालिका– २, घरबारीटोलमा डेरा गरेर बस्दै आएकी छिन् । ‘मलाई देख्नेबित्तिकै बोक्सी आएको भन्दै आफ्ना छोरीलाई कोठाभित्र पस्न लगाउँछन् । मेरो एउटा आँखा छैन । उनीहरूले मलाई कानी भनेर मेरो अपमान गरे । बोक्सी भनेर घाँटीसमेत थिचे,’ उनले भनिन् ।
उनले सहोदर भतिजीहरूले गरेको व्यवहारबारे दाजुलाई जानकारी गराउँदासमेत उनीहरूले नमानेको बताइन् । जिल्ला प्रहरी कार्यालयमा उजुरी दिएपछि फिर्ता लिन दबाब दिएको बताउँदै उनले आफ्नै दाजुका छोरीले दिएको पीडाले रातमा निद्रा र दिनमा भोक नलागेको बताइन् ।
पीडक पक्षले दिएको दबाब सहन नसकेर २३ भदौ बेलुकी बेहोस भएको उनले बताइन् । ‘उजुरी फिर्ता लग्नु पऱ्याे भन्दै पटक–पटक आउन थालेपछि रिँगटा लाग्यो । कतिखेर म बेहोस भएँ पत्तै पाएन । अस्पतालको बेडमा होस खुलेपछि मात्र थाहा पाएँ,’ उनले भनिन् ।
उनले बोक्सीको आरोप लगाउने भतिजी र दाजुसँग सधैँका लागि सम्बन्ध ताेडेको बताइन् । अनाहकमा आरोप लगाउनेलाई कानुनबमोजिम कडा कारबाही गर्न उनले प्रहरी, प्रशासनसँग माग गरेकी छिन् । उनले कुनै हालतमा पनि माफी दिन नसकिने स्पष्ट पारिन् । ‘उनीहरूले मलाई फुपू र बहिनी मान्दैनन् भने मैले पनि सम्बन्ध तोडिसकेँ,’ आमनाले भनिन् ।
आमनाले जाहेरी दिएपछि बाँकेका प्रहरी प्रमुख प्रहरी उपरीक्षक ओमबहादुर राना उनको कोठामा आफैँ पुगेर वास्तविकता बुझेका छन् । उनले सहोदर भतिजीले लगाएको आरोप र जाहेरीबारे आमनासँग सोधपुछ गरेको बताए । बोक्सीको आरोप लगाउनेलाई हदैसम्मको कारबाही गर्न आमनाले माग गरेको रानाले बताए । ‘बोक्सीको आरोप लगाउनेलाई माफी दिने पक्षमा आमना देखिनुभएन,’ आमनाको कोठाबाट फर्किँदै गरेका प्रहरी प्रमुख रानाले भने ।
उनले बोक्सीको आरोप लगाउनेविरुद्ध प्रहरीमा उजुरी दर्ता भइसकेको बताउँदै पक्राउ पुर्जीसमेत आइसकेको बताए । ‘जाहेरीको आधारमा कारबाहीका लागि कानुनी प्रक्रिया अगाडि बढिसकेको छ,’ उनले भने ।
आरोपमा कुनै सत्यता नभएको मजुनाको दाबी
आमनाले लगाएको आरोपमा कुनै सत्यता नभएको पीडक भनिएकी मजुना खातुनले बताइन् । उनले सामान्य विवादलाई फुपूले ठूलो बनाएर प्रहरीमा उजुरी दिएको बताइन् । विनाप्रमाण उजुरी दिएको बताउँदै उनले घरमा मिल्ने विवादलाई अर्कैको बहकाउमा लागेर फुपूले उजुरी दिएको जिकिर गरिन् । सामान्य विवादलाई बोक्सीतिर मोडियो । आफ्नै फुपूले यति ठूलो केस गर्नुहोला भन्ने सोचेकासमेत थिएनौँ,’ उनले भनिन् ।
