एकैदिन १,०६९ मा संक्रमण, मृतकको संख्या २३९ पुग्यो, लक्षण भएका २५ प्रतिशत संक्रमितको मृत्यु
कोरोना भाइरस संक्रमण सुरु भएको आठ महिनापछि नेपालमा संक्रमितको संख्या ४० हजार नाघेको छ । पछिल्लो २४ घन्टामा एक हजार ६९ जनामा कोरोना पुष्टि भएसँगै देशभर संक्रमितको संख्या ४० हजार पाँच सय २९ पुगेको छ ।
मंगलबार काठमाडौं उपत्यकामा चार सय ८१ जना कोरोना संक्रमित थपिएका छन् । काठमाडौंमा तीन सय ९३, ललितपुरमा ५८ र भक्तपुरमा ३० संक्रमित थपिएको स्वास्थ्य तथा जनसंख्या मन्त्रालयले जनाएको छ । योसँगै उपत्यकामा कोरोना संक्रमितको संख्या ६ हजार दुई सय पाँच पुगेको छ । काठमाडौंमा पाँच हजार १५, ललितपुरका सात सय ४३ र भक्तपुरमा पाँच सय ४७ संक्रमित पुगेको मन्त्रालयले जनाएको छ ।
त्यस्तै, पछिल्लो २४ घन्टामा कोरोनाबाट ११ जनाको मृत्यु भएको छ । योसँगै मृत्यु हुनेहरूको संख्या दुई सय ३९ पुगेको छ । स्वास्थ्य मन्त्रालयका अनुसार कोरोनाबाट पर्साका तीन, काठमाडौं र महोत्तरीका दुई–दुई, बारा, सिराहा, चितवन र मकवानपुरका एक–एकजनाको ज्यान गएको छ ।
स्वास्थ्य मन्त्रालयले समुदायमा संक्रमण फैलिएको जनाउँदै जनता आफैँ सचेत बन्नुपर्ने बताएको छ । अफै पनि ठूलो संख्यामा मानिसहरूले मास्कको प्रयोग नगरेको तथा गरे पनि उपयुक्त तरिकाले नलगाउने गरेको जनाएको छ । सरकारले कोरोना नियन्त्रण गर्न निषेधाज्ञा जारी गरे पनि संक्रमितको संख्या दैनिक बढिरहेको छ । त्यसमा पनि काठमाडौं उपत्यका उच्च जोखिममा परेको चिकित्सकहरूले बताएका छन् । सक्रिय संक्रमित रहेका ७५ जिल्लामध्ये काठमाडौंमा दैनिक संक्रमण धेरै रहेको छ ।
कस्तो छ नेपालको अवस्था
- निको भएको : २२,१७८
- सक्रिय संक्रमित : १८,११२
- होम आइसोलेसनमा : ७,२८०
- संस्थागत आइसोलेसनमा : १०,८३२
- २४ घन्टामा डिस्चार्ज : ७६८
- पिसिआर परीक्षण : ७,०५,५६०
- २४ घन्टामा पिसिआर परीक्षण : १२,०८८
- क्वारेन्टाइनमा भएका : ७,३९०
कोरोना लक्षण भएका २५ प्रतिशत संक्रमितको मृत्यु
कोरोना भाइरसको संक्रमणबाट सोमबारसम्म मृत्यु भएका दुई सय २८ जनामध्ये एकचौथाइ कोरोनाको लक्षण देखिएका संक्रमित रहेको पाइएको छ ।पहिलोपटक नेपालमा ४ जेठमा संक्रमितको मृत्यु भएको थियो । त्यसयता क्रमशः मृत्युदर बढ्दै गएको छ । सुरुवातका दिनमा ५० वर्षभन्दा कम उमेर समूहको मृत्यु बढी देखिएको थियो भने अहिले वृद्धवृद्धाको मृत्युदर बढेको छ ।
स्वास्थ्य तथा जनसंख्या मन्त्रालयले सोमबारसम्म मृत्यु भएकाहरूको तथ्यांक विश्लेषण गरेको छ भने मंगलबार थपिएका मृतकको विस्तृत विवरण आउन बाँकी छ । मन्त्रालयका अनुसार सोमबारसम्म मृत्यु भएका दुई सय २८ मध्ये २५ प्रतिशत लक्षण भएको पाइएको इपिडिमियोलोजी तथा रोग नियन्त्रण महाशाखाका निर्देशक डा. वासुदेव पाण्डेले बताए । उनका अनुसार ५७ जना लक्षणसहितका संक्रमितको मृत्यु भएको छ ।
त्यस्तै, कोरोनाबाट मृत्यु भएका अन्य संक्रमित भने विभिन्न जटिल रोग लागेकाहरू छन् । मृतकमा मुटु, मिर्गौला, क्यान्सर, मधुमेहजस्ता रोग लागेका संक्रमित धेरै रहेको देखिएको छ । लक्षण नदेखिए पनि त्यस्ता संक्रमितका शरीरका अंगहरू कोरोना भाइरसले चाँडो खराब हुने गरेको चिकित्सकहरू बताउँछन् ।
आठ महिनापछि आएर कोरोनाले नेपालमा रूप परिवर्तन गरेको स्वास्थ्य तथा जनसंख्या मन्त्रालयले जनाएको छ । मन्त्रालयका प्रवक्ता डा. जागेश्वर गौतमले कोरोना भाइरसले रूप परिवर्तन अर्थात् कडा भएर आएकाले मृत्युदरमा छिटो वृद्धि भएको बताए ।
त्यस्तै, कोरोना भाइरसले रूप परिवर्तन गरेसँगै सघन उपचार कक्ष र भेन्टिलेटरको सहायता चाहिने संक्रमित पनि दैनिक बढ्दै गएका छन् । कोरोना संक्रमितको मृत्युदरलाई कम गर्ने उद्देश्यले परीक्षणमा रहेका औषधि रेम्डिसिभिर र प्लाज्मा थेरापी विधि पनि प्रयोग गरेर उपचार भइरहेको छ । त्यस्तै, आयुर्वेदिक औषधि पनि संक्रमितको उपचारमा प्रयोग गरिएको छ ।
